Метро аҳолининг узоғини яқин қилувчи муҳим жамоат транспорти. Қолаверса метро пойтахтнинг рамзи ҳамдир. Шунингдек, доимо гавжум ва серқатнов ҳисобланган Тошкент метрополитенида йўловчиларнинг хавфсизлигини таъминлаш масаласи ҳам устувор вазифа.

Статистикага кўра, бугунги кунда ҳаракатдаги вагонлар сони 256 та.  Метролар бир кунда 620-630 минг нафардан ортиқ йўловчини ташийди. Бу кўрсаткич  ёз ойлари  330-340 минг нафарни ташкил қилади.  

Мутахассисларнинг таъкидлашича, Юнусобод йўналишининг “Туркистон” ҳамда “Юнусобод” бекатлари 2023 йил 26 август санасидан бошлаб 4 ой муддатга ёпилади ва бу муддат давомида режали профилактик ишлар амалга оширилади.  

Хўш, мазкур бекатлар фаолиятининг вақтинча муддатга тўхтатилиши қурилиш сифати билан боғлиқ бўлиши мумкинми? Тегишли талабларга кўра қанча муддат давомида бекатларда профилактик ишлар амалга оширилиши лозим?  

– Тошкент метрополитенининг Юнусобод йўналишидаги “Юнусобод” ва “Туркистон” бекатлари қарийб 3 йилдан буён йўловчиларга хизмат кўрсатиб келмоқда, – дейди “Тошкент метрополитени” ДУК матбуот хизмати раҳбари Тўйчи Мирзаев. – Жаҳон тажрибасидан келиб чиққан ҳолда метропоездлар ҳаракати ва йўловчилар хавфсизлигини таъминлаш ҳамда сифатли хизмат кўрсатиш мақсадида ер ости метро тоннелари ва бекатлари маълум муддат эксплуатация қилинганидан сўнг, ундаги инфратузилмаларда ўрнатилган ускуналарнинг ҳамда тоннелларнинг ҳолатлари барқарорлигини текшириш ва режали профилактик ишларни амалга ошириш лозим.  

Шуларни ҳисобга олган ҳолда юқорида номлари тилга олинган бекатларда ҳам маълум муддат давомида режали профилактик ишлар амалга оширилади.  Ижтимоий тармоқларда бу ҳолат нотўғри талқин қилинмоқда ва турли муҳокамаларга сабаб бўлмоқда. Яъни, профилактик ишлар амалга ошириш бу таъмирлаш ишлари эмас ва бекатларнинг вақтинчалик ёпилиши  қурилиш сифати билан ҳам боғлиқ эмас. Юнусобод йўналишининг I босқичи 2001 йилда ишга туширилганидан сўнг, режали профилактик ишларни амалга ошириш учун 2002 йил 3 ой муддатга ёпилган.  

“Юнусобод” ва “Туркистон” бекатлари поездлар ҳаракати вақтинча тўхтатиб турилганида “Шаҳристон” ва “Минг ўрик” бекатлари оралиғида одатий тарзда ҳаракатланиши давом этади ва бу йўналишда поездлар ҳаракати оралиқ вақти (интервал) 5 дақиқагача қисқартирилади.  

Профилактик ишларни амалга ошириш йўловчиларга ноқулайлик туғдирмаслиги керак. 26 августдан бошлаб, 4 ой мобайнида “Туркистон-Юнусобод-Шаҳристон” метро бекатлари оралиғида бепул хизмат кўрсатувчи катта сиғимли автобуслар (метробус) ҳаракати йўлга қўйилади. Ушбу автобусларнинг кунлик иш вақти тонгги 06:00 дан тунги 00:00 га қадар амалга оширилади.

Манба:ЎзА

Маълумки, охирги 3 йилда юртимизда камбағалликни қисқартириш ва янги иш ўринлари яратиш борасида бутунлай янги тизим яратилди. Энг аввало, Ўзбекистонда камбағалликнинг мавжудлиги расман тан олинди. Энг муҳими уни камайтиришга давлатимиз ижтимоий-иқтисодий сиёсатининг энг устувор вазифаларидан бири сифатида қаралмоқда.

Хусусан, Президентимизнинг жорий йил 12 июндаги “Камбағалликни қисқартиришда тадбиркорлик субъектлари билан ўзаро манфаатли ҳамкорлик ўрнатишга қаратилган чора-тадбирлар тўғрисида”ги фармонига асосан «20 минг тадбиркор — 500 минг малакали мутахассис» дастури ишга туширилди.  

Жорий йилнинг 1 июнидан бошлаб “20 минг тадбиркор – 500 минг малакали мутахассис” дастурини амалга ошириш бошланди. Мазкур дастурни бажариш учун барча манбалардан 1 миллиард долларга тенг маблағлар ажратилади. Ушбу маблағлар ҳисобидан ўта муҳим 2 та тадбирларни амалга ошириш назарда тутилмоқда.  

Камбағал оилалар аъзоларини касбга ўқитиб, ишли қилиш бўйича лойиҳа аҳамиятига қараб, амалдагидан паст фоизларда ва узоқроқ муддатга кредит берилади. Тадбиркорнинг “амалий мономарказ” ташкил қилиш ва жиҳозлаш ҳамда касбга ўқитиш харажатлари тўла қоплаб берилади.  

Яна бир муҳим жиҳати шундаки, солиқлардан алоҳида имтиёзлар берилади. Камида 20 фоиз камбағал оила аъзосини бир йил давомида иш билан таъминласа, мол-мулк ва ер солиқларидан озод қилинади. Камбағал оила аъзоси даромад солиғидан озод қилинади. 5 миллион сўмгача иш ҳақи тўлаётган тадбиркорларга ижтимоий солиқ ставкаси 2 бараварга камайтирилади.  

Улар фаолиятида солиқ текширувлари ўтказилмайди. Уларга қўшилган қиймат солиғи, шунингдек, ортиқча тўланган солиқлар текширувсиз қайтариб берилади. Қўшилган қиймат солиғи бўйича гувоҳнома муддатидан илгари бекор қилинмайди. Солиқлардан қарздорликни бир йилгача кечиктириб тўлаш имкони берилади. Божхона тўловларини суғурта кафолатисиз олти ойга бўлиб-бўлиб тўлашга рухсат берилади.  

Бундан ташқари, “20 минг тадбиркор – 500 минг малакали мутахассис” дастурида солиқ имтиёзлари тақдим этилади. Мисол учун, мазкур дастурда тадбиркорлик субъектлари уларнинг ҳуқуқ ва мажбуриятлари акс эттирилган «Ҳамкорлик шартномалари» асосида ихтиёрий равишда иштирок этади.  

Тошкентда 3-сентябрь куни Мустақиллик 32 йиллигига бағишланган “Янги нафас” халқаро оммавий югуриш мусобақаси ўтказилади. Шу муносабат билан пойтахтимиздаги айрим кўчаларда автотранспорт воситаларининг ҳаракати вақтинча чекланади.

➖31-август куни соат 10:00 дан 3-сентябр куни соат 10:00 гача:

➖Афросиёб кўчаси И. Каримов шоҳкўчаси билан кесишмасидан Бешёғоч кўчаси билан кесишмасигача.
3-сентябр куни соат 05:00 дан 09:00 гача:
➖Афросиёб кўчаси И. Каримов шоҳкўчаси билан кесишмасидан Абдулла Қодирий, Ойбек ва Нукус кўчалари бўйлаб, Рим-Католик черковигача.

Тошкент шаҳридаги “Имом Термизий” жоме масжиди имом-хатиби Исоқжон Бегматовнинг солиқлар ва “кешбэк” иловаларидан фойдаланиш тўғрисидаги қилган чиқиши кескин мунозараларга сабаб бўлгани ҳақида хабар берган эдик.

Шунингдек, ушбу ҳолат юзасидан Ўзбекистон Мусулмонлар идораси муносабат билдирган эди. 

Бугун, 25 август куни Ўзбекистон мусулмонлари идорасида Ички назорат комиссияси томонидан халқ орасида «Исоқжон домла» деб танилган Тошкент шаҳридаги «Имом Термизий» жоме масжиди имом-хатиби Исоқжон Бегматовнинг ижтимоий тармоқлардаги бир қатор чиқишлари кенг муҳокама қилинди. Бу ҳақда Идора Матбуот хизмати хабар бермоқда.

Комиссия аъзолари томонидан имом-хатибнинг турли баҳс-мунозараларга сабаб бўлган ҳиссиётга берилиб қилган кескин чиқишлари, уламолар фатволарига нисбатан айрим тескари фикрлари, ихтилофли масалаларни кўтариши оқибатида, низо ва қарама-қаршиликларга сабаб бўлгани қаттиқ танқид остига олинди.

Ички назорат комиссияси аввал ҳам ушбу имом-хатибнинг мана шундай чиқишларини бир неча бор кўриб чиқиб, уни жиддий огоҳлантирган эди. Афсуски, бундай ҳолатлар яна такрорланишда давом этди.

Йиғилишда И.Бегматовнинг мазкур чиқишлари Ўзбекистон мусулмонлари идораси муносабатини мутлақо ифода этмаслиги, балки унинг ўзбилармонлик ила айтган шахсий фикр-мулоҳазалари экани таъкидланди.

И.Бегматов ижтимоий тармоқларда муҳокамага сабаб бўлган чиқишларида жиддий хатога йўл қўйганини эътироф этди ва пушаймонлигини билдирди.

Ички назорат комиссияси қарорига асосан имом-хатиб мазкур чиқишларида ушбу йўналишдаги буйруқлар талаблари, ички тартиб-қоидалари ҳамда меҳнат мажбуриятларига мунтазам равишда риоя этмагани учун Исоқжон Бегматов Тошкент шаҳридаги “Имом Термизий” жоме масжиди имом-хатиби вазифасидан озод этилди.

«Чорвачиликда идентификация қилиш тизими ва наслчилик соҳасини такомиллаштиришга оид қўшимча чора-тадбирлар тўғрисида”ги Президент қарори қабул қилинди. Бу ҳақда Huquqiy axborot хабар бермоқда.

Қарорга кўра, Ўзбекистонда ҳайвонларни идентификация қилиш, рўйхатга олиш ва кузатиш тизими қуйидаги 2 босқичда жорий қилинади:

1-босқич – 2023–2024-йилларда чорвачиликка ихтисослаштирилган 25 та туманда ҳайвонларни идентификация қилиш, рўйхатга олиш ва кузатиш тизимини жорий қилиш бепул амалга оширилади.

2-босқич – 2025–2026-йилларда республиканинг қолган туманларида.

Ветеринария ва чорвачиликни ривожлантириш қўмитаси соҳада масъул орган ҳисобланади.

Қарор билан Қўмита ҳузурида давлат муассасаси шаклида Ҳайвонларни идентификация қилиш, рўйхатга олиш ва кузатиш маркази ташкил этилади.  

Шунингдек, 25 та туманда қуйидаги йўналишларни ўз ичига олган чорвачилик кластерлари ташкил этилади:

— гўшт ва сут маҳсулотларини етиштириш, шунингдек, аҳолидан йиғиб олиш, қайта ишлаш ва тайёр маҳсулот шаклида реализация қилиш;

— тайёр озуқа ем маҳсулотларини ишлаб чиқариш ва уларни аҳолига қулай бўлган ҳудудларда сотиш шохобчаларини ташкил этиш;

— аҳоли хонадонларига маҳсулдор наслли молларни етказиб бериш;

— чорва молларини сўйиш кушхоналари, териларни қабул қилиш ва қайта ишлаш қувватларини ишга тушириш;

— терини қайта ишловчи корхоналар билан биргаликда кооперация асосида теридан тайёр маҳсулотларни ишлаб чиқариш.

Шунга кўра, ташкил этиладиган чорвачилик кластерларига:

— 60 миллион АҚШ доллари миқдорида кредитлар ажратилади;

— пахта ва ғалла экин майдонларини қисқартириш ҳисобига ҳар бир туманда камида 100–150 гектар майдон озуқабоп экинлар экиш учун ажратилади.

2023 йил 1 декабрдан чорвачилик хўжаликлари ўз эҳтиёжи учун импорт қилган наслдор қорамолларга ҳисобланган қўшилган қиймат солиғини Қўмита кафолати асосида 180 кун ичида тўлаб бериш тизими жорий этилади.

2023 йил 1 сентябрдан 2025 йил 31 декабргача давлат томонидан қуйидаги тартибда субсидия ажратилади:

— чорвачилик маҳсулотлари етиштирувчи хўжаликларга хорижий давлатлардан импорт қилинган наслдор қорамолнинг ҳар бир бошига 2 миллион сўм, наслдор қўй ва эчкининг ҳар бир бошига 400 минг сўм миқдорида;

— паррандачилик хўжаликларига ҳар бир бош 1 кунлик наслдор жўжани импорт қилиш билан боғлиқ харажатларнинг 15 минг сўмини қоплаш учун.

Афғонистон билан чегарадош давлатларда унинг 8,2 миллиондан ортиқ фуқароси бор. Уларнинг қўшни давлатлардаги тақсимоти қуйидагича:

• Эронда — 4,5 млн;
• Покистонда — 3,7 млн;
• Тожикистонда — 9,5 минг;
• Ўзбекистонда — 2 мингни ташкил қилади.

Республика ишчи гуруҳининг жойларда ижтимоий-иқтисодий вазиятни ўрганиш ҳамда «Обод хонадон», «Обод кўча» ва «Обод маҳалла» мезонларини жойларда жорий этиш, аҳоли билан мулоқот ўтказиш ва муаммоларни бартараф бўйича фаолияти Бухоро вилоятида давом эттмоқда.

Хусусан, Президент маслаҳатчиси ўринбосари бошчилигида тезкор штаб ва вилоятнинг 4 та сектори кесимида ишчи гуруҳлар ташкил этилиб, ҳар бир гуруҳга Президент Администрацияси, Давлат хизматини ривожлантириш агентлиги, Халқ қабулхоналарининг масъул ходимлари, 15 та республика вазирлик ва идоралари ҳамда вилоят, туман ва шаҳар секторлари, соҳавий ташкилотлар раҳбарлари жалб этилди.

Ҳудудда аҳоли учун долзарб бўлиб турган муаммоларни ҳал этиш бўйича қатор ишлар амалга оширилди.

Жумладан, йўл, коммуникация тармоқлари, инфратузилма ҳолатини яхшилаш мақсадида, жами 12,6 км ички йўлларга асфальт, бетон қопламаси ётқизиш ҳамда шағаллаштириш ишлари бажарилди.

Электр таъминотини яхшилаш учун 101 дона темир-бетон таянчлар ўрнатиш ҳамда 1,5 км электр тармоқ тортиш ишлари бажарилди. Ичимлик сувини яхшилаш учун янгидан 1 600 метр ичимлик суви тармоғи тортилди.

Аҳоли соғлиғини сақлаш масалалари ҳам Республика ишчи гуруҳи эътибори марказида бўлди. Шофиркон тумани мақсадли тиббий кўрик ташкил этилиб, кўрик  давомида 343 нафар фуқаролар чуқурлаштирилган тиббий кўрикдан ўтказилди. Шундан, тиббий кўрик жараёнида 305 нафар фуқароларда турли касалликлар аниқланди, 46 нафар беморларга туман ва вилоят муассасаларида даволанишга муҳтож деб топилиб, даволаниш ва диагностика учун бепул йўлланмалар берилди.

Аҳоли орасида тадбиркорликни ривожлантириш, бандлик масалаларини ҳал этиш мақсадида тижорат банклари томонидан 719 нафар фуқаро ва тадбиркорлик субъектларига 68 107,8 млн. сўм миқдорида кредитлар ажратилиши таъминланди. Шундан, оилавий тадбиркорлик йўналишида 191 та, хизмат кўрсатиш соҳасига 6 та, қишлоқ хўжалиги соҳасини ривожлантириш йўналишида 10 та, саноатни  ривожлантириш йўналишида 2 та фуқарога кредит маблағлари ажратилди.

Шунингдек, 5 нафар ишсиз хотин-қизлар бандлигини таъминлаш мақсадида уларнинг тикувчилик касбини эгаллаганлигини инобатга олиб, “Аёллар дафтари” жамғармаси маблағлари ҳисобидан 23,5 млн. сўмга тикув машиналари олиб берилди. Ижтимоий ҳимояга муҳтож, боқувчисини йўқотган ҳамда ногиронлиги бўлган 91 нафар хотин-қизларга “Аёллар дафтари” жамғармаси ҳисобидан жами 120,1 млн. сўм моддий ёрдам пуллари олиб берилди, 3 нафар фуқарога жами 19,2 млн. сўм миқдорида субсидия маблағлари эвазига тикувчилик фаолиятини бошлаш учун пресс асбоб-ускунаси ва умумий овқатланиш фаолияти учун зарур бўлган газ плиталари топширилди.

Бугун Тошкент марказидаги айрим кўчаларда электр таъминоти вақтинча тўхтатилади. Бу ҳақда “Ҳудудий электр тармоқлари” Тошкент шаҳар филиали хабар берди.

Куз-қиш мавсумига пухта тайёргарлик кўриш мақсадида пойтахтнинг Миробод ва Яккасарой туманларидаги МФЙларнинг қатор кўчаларида электр таъминоти вақтинча ўчирилади.

Куз-қиш мавсумига пухта тайёргарлик кўриш мақсадида пойтахтнинг Миробод ва Яккасарой туманларидаги МФЙларнинг қатор кўчаларида электр таъминоти вақтинча ўчирилади.

Республика Гидрометеорология хизмати агентлигининг хабар беришича, 25 август куни Тошкентда ҳаво бироз булутли бўлади, вақти-вақти билан ўзгариб туради, ёғингарчилик кутилмайди. Шарқдан секундига 5-10 метр тезликда шамол эсади. Кечаси 20-22 даража илиқ, кундузи 34-36 даража иссиқ бўлади.

Ижтимоий тармоқларда метан «заправка»ларда навбатнинг узайиб бораётгани, бунга бир қатор метан «заправка»ларнинг ёпиқлиги сабаб бўлаётгани, мазкур вазият метан нархининг ошишидан дарак бўлиши мумкинлиги ҳақида турли хабарлар тарқалди. Ҳолат юзасидан Энергетика вазирлиги маълумот берди.

Маълум қилинишича, республикадаги барча метан «заправка»ларга август ойи учун уларнинг талабларига асосан белгиланган лимитга кўра, табиий газ тўлиқ етказиб берилган. Ҳеч қандай чеклов киритилмаган.

«Қайсидир метан ’заправкаʼ ўз фаолиятини вақтинча тўхтатиб турган бўлса, демак, бу қандайдир техник сабаблар ёки бошқа бир омил туфайли бўлиши мумкин. Шунингдек, аввал таъкидлаганимиздек, метан ’заправкаъларда сотиладиган бир куб газ учун белгиланган нарх ошгани йўқ», — дейилади хабарда.

Вазирликнинг эслатишича, аҳоли ва бошқа тоифадаги истеъмолчилар қонунчиликда ўрнатилган тартибда белгиланган муддатларда табиий газ нархининг оширилиши ҳақида аввалдан огоҳлантирилади.

АОКАда ўтказилган брифингда “Дори-дармон” акциядорлик компанияси ахборот хизмати раҳбари Кумуш Пардаева дори воситаларининг улгуржи ва чакана нархларининг шакллантирилиши ҳақида маълумот берди.

– Дори воситалари ва тиббий буюмларнинг база нархи, улгуржи ва сотув нархларининг шаклланиш тартиби Ўзбекистон Республикаси Президентининг 2016 йил 31 октябрдаги “Аҳолини дори дармон воситалари ва тиббиёт буюмлари билан таъминлашни янада яхшилашга доир чора-тадбирлар тўғрисида»ги қарорига мувофиқ белгиланади, – деди К.Пардаева. – Яъни четдан олиб келинадиган, шунингдек, мамлакатимиз ишлаб чиқарувчиларидан сотиб олинадиган дори-дармон воситалари ва тиббиёт буюмларини улгуржи ва чакана сотиш, уларни етказиб беришда иштирок этувчи воситачилар сонидан қатъи назар, улгуржи савдо учун сотиб олинган қийматидан 15 фоиздан, чакана савдо учун улгуржи нархидан 20 фоиздан ортиқ бўлмаган чекланган савдо устамалари қўлланилган ҳолда амалга оширилади.  

2018 йил 20 июндаги “Дори воситаларини давлат рўйхатидан ўтказиш самарадорлигини ошириш ва аҳолини улар билан таъминлашни яхшилаш чора-тадбирлари тўғрисида”ги Президент фармонига мувофиқ ижтимоий аҳамиятга эга дори воситалари ва тиббиёт буюмларини сотиш уларнинг сотиб олиш қиймати ёки улгуржи нархига 10 фоиз чекланган савдо устамаси қўлланилган ҳолда амалга оширилади.  

Мазкур фармонга мувофиқ соғлиқни сақлаш вазирининг 2019 йил  12 июндаги  буйруғига асосан “Ижтимоий аҳамиятга эга дори воситалари ва тиббиёт буюмлари”нинг рўйхати тасдиқланган.    

Шунингдек, 2019 йил 30 декабрда қабул қилинган “Ўзбекистон Республикаси фармацевтика тармоғида ислоҳотларни чуқурлаштиришга доир қўшимча чора-тадбирлар тўғрисида»ги Президент қарорига мувофиқ, Фармацевтика тармоғини ривожлантириш агентлиги расмий веб-сайтида  улгуржи ва чакана чекланган нархлар тўғрисидаги маълумотлар акс эттирилган автоматлаштирилган ахборот тизими ишга туширилган.    

– Компаниямизда дори воситаларининг чакана нархларига белгиланган устамалар мазкур дастурга киритилган дорининг чакана референт нархидан юқори бўлмаслиги назорат қилинади, – деди К.Пардаева. – Бугунги кунда ҳукуматимиз томонидан аҳолини сифатли дори воситалари ҳамда тиббий буюмлар билан таъминланганлик даражасини ошириш, соҳада таъсирчан жамоатчилик назоратини олиб бориш, дори воситалари  нархини шакллантиришнинг шаффоф ва самарали механизмларини жорий этиш мақсадида кенг кўламли ишлар амалга оширилмоқда.    

Хусусан, Президентимизнинг 2022 йил 26 октябрдаги  “Аҳолини сифатли дори воситалари ва тиббий буюмлар билан таъминлаш юзасидан қўшимча чора-тадбирлар тўғрисида»ги қарорига мувофиқ, Рақобатни ривожлантириш ва истеъмолчилар ҳуқуқларини ҳимоя қилиш қўмитаси томонидан нархларни назорат қилувчи дастур ишлаб чиқилган. Истеъмолчилар томонидан сотиб олинган дори воситалари учун дорихоналар томонидан тақдим этиладиган харид чекининг фискал белгиси “Солиқ” мобил иловасида рўйхатдан ўтказилганда дори воситалари нархлари Фармацевтика тармоғини ривожлантириш агентлигининг ахборот тизимидаги дори воситаларининг чакана референт нархлари билан автоматик тарзда солиштирилади. Агар белгиланган устамалардан ортиқча маблағ олингани аниқланса, автоматик равишда Рақобат қўмитасига хабар юборилади. Харид чеки бўйича нарх дори воситасининг чакана референт нархидан ортиқ деб топилганда, ҳуқуқбузардан жарима ундирилади.  

Харид чекида сотиб олинган дори воситалари ва тиббий буюмларнинг тўлиқ миқдорда кўрсатилмаслиги савдо ёки хизмат кўрсатиш қоидалари тўғрисидаги қонунчиликни бузиш сифатида эътироф этилади.  

– Компаниямизда дори воситалари ва тиббий буюмларнинг чакана нархлари белгилангач, мутахассислар томонидан компаниямизнинг “М-Аптека+” дастурига киритилади, – деди К.Пардаева. – Ушбу дастурга компанияга қарашли дорихона тармоқларидаги барча компьютерлар уланган. Шунингдек, дастурда дори воситалари ва тиббий буюмларнинг улгуржи ва чакана устамаларига қонун доирасида чеклов қўйилган. Бу ўз навбатида дори воситалари ва тиббий буюмларнинг чакана нархларини сунъий равишда оширилишининг олдини олади.    

Манба:ЎзА

4 сентябрдан янги ўқув йили бошланади ва жамоат транспортига бўлган талаб ошади. Шу сабабли, «Тошкент метрополитени» поездлар ҳаракатидаги оралиқ вақтни қисқартиришни режалаштирмоқда.

Хабарда айтилишича, метродан фойдаланишда йўловчиларга қулайлик яратиш мақсадида, ички ресурслардан максимал даражада фойдаланган ҳолда вақт оралиқлари қисқартирилади. Жумладан, тиғиз вақтларда Чилонзор йўналишида 1,5 дақиқалик, Ўзбекистон йўналишида эса 3-3,5 дақиқалик ҳамда Юнусобод йўналишида 5 дақиқалик интервалда поездлар ҳаракати йўлга қўйилади.

Дам олиш кунлари Ўзбекистонга нам ва салқин ҳаво кириб келади. Шу кунлари шамол тезлиги кучайиб, чанг-тўзон кузатилиши мумкин.

27-28 август кунлари ҳарорат 23-28°гача пасаяди. Ушбу кунлари ёмғир ёғади, момақалдироқ бўлиши мумкин. Кучли ёмғирлар ҳисобига тоғли ҳудудларда 27-29 август кунлари сел-сув тошқин ҳодисалари юзага келиши мумкин.