Қонунчиликка кўра, аграр тармоқда ўз бизнесини ташкил этишга кўмаклашиш, қишлоқ хўжалиги маҳсулотларини етиштиришда деҳқон хўжаликларининг улушини ошириш мақсадида узоқ муддатга қишлоқ хўжалигига мўлжалланган ер майдонларини ижарага олиб, белгиланган тартибда рўйхатдан ўтган деҳқон хўжаликлари ва кичик тадбиркорлик субъектларига 50 миллион сўмгача гаровсиз кредит берилиши белгиланган.

Бундан буён ички йўлларни қуриш ва таъмирлаш учун бюджет маблағлари фақат “Менинг йўлим” дастури орқали ажратилади. “Энди қаерда ички йўл қуриш, қаердаги йўлларни таъмирлашни одамларимизнинг ўзи ҳал қилади.

Шундай қилсак, лойиҳани танлаб олишда ва сифатни таъминлашда очиқлик бўлади, тўлиқ жамоатчилик назорати ўрнатилади”, — деди Шавкат Мирзиёев.

Ички йўлларни қуриш ва таъмирлаш учун 2024 йилда “Менинг йўлим” дастури доирасида 800 миллиард сўм ажратиш топширилди.

Тошкент шаҳар Экология бошқармаси матбуот хизматининг хабарига кўра, пойтахтда қурилиш олиб бораётган «ASCENDANT GROUP» МЧЖ дарахт ва буталарга шикаст етказиш жавобгарликка сабаб бўлиши мумкинлиги тўғрисида огоҳлантирилиб, қурилиш майдонидаги жами 30 туп дарахт хатловдан ўтказилган. Бироқ қурилиш ишларини олиб бориш жараёнида қонун бузилиши ҳолатига йўл қўйилганлиги аниқланган.

Қайд этилишича, ҳудуддаги 3 туп ўрик, 2 туп гилос, 1 туп хурмо дарахтлари ҳамда 3 туп чинор, 1 туп шумтол дарахтларининг ўсишдан тўхтайдиган даражада шикастлантирилганлиги маълум бўлган.

Оқибатда табиатга етказилган зарар 248 млн 94 минг сўмни ташкил этган.

Ҳозирда мазкур ҳолат юзасидан тўпланган ҳужжатлар Прокуратура органларига тақдим этилган.

Президент ҳузурида йўл хўжалиги соҳасини ислоҳ қилиш бўйича долзарб масалалар юзасидан йиғилиш бошлангани ҳақида хабар берган эдик. Йиғилишда айтилишича, йўлларни нормал ҳолда ушлаб туриш учун йилига камида 15 триллион сўм маблағ керак бўлади.

“Бир нарсани тушуниб олиш зарур. Ҳатто энг ривожланган мамлакатларда ҳам йўлларни қуриш ёки таъмирлаш тўлиқ давлат ҳисобидан амалга оширилмайди. Шунинг учун биз ҳам бу ишларга хусусий шерикларни фаол жалб қилишимиз шарт”, — деди Президент.

Мисол учун, Европа Иттифоқида йўл хўжалиги соҳасида хусусий шериклик асосида сўнгги 10 йилда 120 миллиард долларлик лойиҳалар амалга оширилган. Бизда эса бу борадаги ишлар сустлиги кўрсатиб ўтилди.

Йўл соҳасидаги хусусий шериклик лойиҳаларида инвесторларга қўйиладиган шартлар ва давлатнинг мажбуриятларини аниқ белгилаш зарурлиги қайд этилди.

Республика Гидрометеорология хизмати агентлигининг хабар беришича, 13 сентябрь куни Тошкентда ҳаво бироз булутли бўлади, вақти-вақти билан ўзгариб туради, ёғингарчилик бўлмайди. Шарқдан секундига 3-8 метр тезликда шамол эсади. Кечаси 13-15, кундузи 26-28 даража илиқ бўлади.

Президент Фармони (ПФ–158-сон, 11.09.2023-й.) билан “Ўзбекистон – 2030” стратегияси тасдиқланди ҳамда уни 2023-йилда ўзи вақтида ва сифатли амалга ошириш бўйича Президент қарори (ПҚ–300-сон, 11.09.2023-й.) қабул қилинди.

Қарорга кўра, 2023/2024 ўқув йилидан:

умумий ўрта таълим муассасалари 10-синф ўқувчиларини касб-ҳунарларга ўргатиш курслари жорий этилади;

Президент мактаблари ва ихтисослаштирилган мактаблар умумий ўрта таълим муассасалари учун “таянч мактаб” этиб белгиланади.

Хоразм вилоятининг Қўшкўпир ва Хонқа туманларида эксперимент тариқасида, барча бошланғич синф ўқувчилари таълим планшетлари билан таъминланади.

Келгусида мазкур тажриба республиканинг барча ҳудудларида босқичма-босқич жорий этилади.

Президентнинг 2023 йил 11 сентябрдаги фармони билан “Ўзбекистон – 2030” стратегияси тасдиқланди.

Унга кўра, мактабларда 1-синфдан компьютер саводхонлиги дарсларини жорий этиш, 5 минг нафаргача профессор-ўқитувчиларни тажриба алмашиш учун, 200 нафаргача ёш олимларни илмий даража олиш учун танлов асосида хорижий илмий ташкилотларга юбориш, Бухоро шаҳрида Жадидлар музейини ташкил қилиш назарда тутилган.

Экология, атроф-муҳитни муҳофаза қилиш ва иқлим ўзгариши вазирлиги томонидан сув, ер ресурслари ва ер ости бойликларини муҳофаза қилиш борасида тизимли ишлар олиб борилмоқда.

Таъкидлаш жоизки, Ўзбекистон Республикаси Президентининг 2022-йил 7-декабрдаги “Ер ости сув ресурсларини муҳофаза қилиш ва улардан оқилона фойдаланишни тартибга солиш бўйича қўшимча чора-тадбирлар тўғрисида”ги қарори билан сув сатҳи 5 метрдан ортиқ пасайиб кетган ҳудудлар (Навоий, Самарқанд, Жиззах, Қашқадарё, Андижон, Наманган, Фарғона вилоятларининг айрим ҳудудлари)да қудуқларни бургъилаш бўйича мораторий эълон қилинди. Ер ости сувларига қудуқларни бургъилаш ҳамда мавжуд қудуқлардан ерларни сув тежовчи технологияларсиз суғориш тақиқланди.

Шунингдек, вазирлик томонидан 2023-йилда саноат корхоналарида локал оқова тозалаш иншоотлари қуриш ва реконструкция қилинишини назоратга олиш, табиий обектларга ифлосланган оқова сувлар ташланишининг салбий таъсирини камайтириш, йирик дарёларнинг сувни муҳофаза қилиш зоналарида ифлослантирувчи манбаларни бартараф қилиш бўйича қатор ишлар амалга оширилмоқда.

Хусусан, меъёридан ортиқча ифлосланган ишлаб чиқариш оқова сувларини ҳосил қилувчи корхоналар билан локал оқова тозалаш иншоотларини қуриш ёки реконструкция қилиш бўйича чора-тадбирлар тасдиқланди. Жумладан, Қорақалпоғистон Республикасида 3 та, Андижонда 6 та, Бухорода 2 та, Жиззахда 7 та, Қашқадарёда 4 та, Навоийда 7 та, Наманганда 6 та, Самарқандда 8 та, Сирдарёда 8 та, Сурхондарёда 4 та, Тошкент вилоятида 13 та, Хоразмда 4 та ва Тошкент шаҳрида 7 та корхонада локал тозалаш иншоотлари қайта тикланмоқда.

Бунинг натижасида кунлик ҳосил бўлаётган 73,2 минг метр куб ёки йиллик 21,9 млн метр куб оқова сувларнинг атроф-муҳитга тозаланмасдан ташланишининг олди олинмоқда, очиқ сув ҳавзаларидаги сув сифати яхшиланмоқда.

Маълумот учун, 2023–2025-йилларда босқичма-босқич республика бўйича 34 та ер усти табиий сув обектлари (дарёлар, кичик дарёлар ва табиий кўллар)нинг санитария-муҳофаза зоналарини белгилаш юзасидан тегишли чора-тадбирлар режалаштирилган.