Ҳурматли фестивал иштирокчилари!

Қадрли дўстлар!

Хонимлар ва жаноблар!

Сиз, азизларни Халқаро ҳунармандчилик фестивалининг тантанали очилиши билан чин қалбимдан самимий муборакбод этиб, барчангизга ўзимнинг чуқур ҳурматим ва эзгу тилакларимни изҳор этишдан ғоят мамнунман.

Ушбу анжуманда жаҳоннинг 70 та давлатидан 260 нафардан зиёд моҳир ҳунарманд ва усталар, таниқли илм, маданият ва санъат намояндалари, оммавий ахборот воситалари ходимлари ҳамда нуфузли халқаро ташкилотлар вакиллари иштирок этаётгани унга дунё миқёсида қизиқиш ва эътибор катта эканидан далолат беради.

Маълумки, ҳар қайси халқнинг амалий санъати унинг бой ўтмиши ва маданияти, азалий қадриятлари, орзу-интилишларини ўзида яққол акс эттиради.

Қарийб уч минг йиллик тарихга эга бўлган бизнинг жонажон Ватанимиз ҳам ҳунармандчилик соҳасидаги ўлмас анъаналари, моҳир уста ва ҳунармандлари билан шуҳрат қозониб келади.

Айниқса, мана шу анжуманга мезбонлик қилаётган гўзал Фарғона вилояти, юртимизнинг қадимий шаҳарларидан бири бўлмиш Ҳўқанди латиф ўзининг бу борадаги бетакрор мероси, тарихий мактаблари билан алоҳида ажралиб туради.

Биз бу ўлкада кулолчилик, ипак ва абрли матолар ишлаб чиқариш, ёғоч ўймакорлиги, ганчкорлик ва наққошлик санъати, пичоқчилик, дўппидўзлик каби ҳунар турлари кенг ривожланиб, миллий бренд даражасига кўтарилгани билан фахрланамиз.

Жаҳон ҳунармандчилик кенгаши қарорига кўра, Қўқон, Бухоро ва Марғилон каби кўҳна шаҳарларимизга Ҳунармандчилик шаҳри мақоми берилганини биз асрлар мобайнида авлоддан-авлодга безавол ўтиб келаётган боқий анъана ва қадриятларимизнинг юксак эътирофи сифатида қабул қиламиз.

Азиз дўстлар!

Кейинги йилларда юртимизда халқ бадиий ва амалий санъатини янада ривожлантириш, бу борада тарихий анъаналарни изчил давом эттираётган моҳир усталарнинг машаққатли меҳнатини муносиб қадрлаш ва қўллаб-қувватлашга алоҳида эътибор берилмоқда.

Бу ҳақда гапирганда, қисқа муддатда бир қатор фармон ва қарорлар қабул қилиниб, ушбу соҳа вакилларига зарур имконият ва имтиёзлар яратиб берилганини таъкидлаш лозим. Ана шундай саъй-ҳаракатларимиз туфайли миллий ҳунармандчилик санъати жадал ривожланмоқда. Бунинг тасдиғини сўнгги етти йилда “Ҳунарманд” уюшмаси аъзолари 7 баробардан зиёд кўпайиб, 10 минг нафардан салкам 80 минг нафарга етгани, соҳада банд бўлганлар эса 280 минг нафарни ташкил этаётгани яққол кўрсатиб турибди.

Соҳа ривожига муносиб ҳисса қўшиб келаётган, иқтидорли шогирдлар тарбиялаб, ўз ижодий мактабларини яратган қўли гул усталаримизнинг шарафли меҳнати давлатимиз ва жамиятимиз томонидан муносиб эътироф этилмоқда. Юзлаб уста ва ҳунармандларимиз Ватанимизнинг юксак мукофотлари – фахрий унвонлар, орден ва медаллар билан тақдирланмоқда.

Ҳунармандчилик халқимиз кундалик ҳаётидан тобора мустаҳкам ўрин эгалламоқда. Мамлакатимизда шу йўналишда юздан зиёд фестивал ва ярмаркалар, савдо кўргазмалари ва бошқа тадбирлар мунтазам ўтказиб келинмоқда.

Юртимизда иккинчи бор ўтказилаётган Халқаро ҳунармандчилик фестивалига уйғун ҳолда Риштон туманида Халқаро кулолчилик форуми бўлиб ўтаётгани ҳам бежиз эмас. Нега деганда, Риштон нафақат мамлакатимиз, балки бутун Марказий Осиёда кулолчилик маркази сифатида маълуму машҳурдир.

Албатта, мана шундай анжуманлар халқ амалий санъатига дахлдор қадимий меросимизни асраб-авайлаш, уни дунё миқёсида кенг тарғиб этиш, ёшларимизни нодир касб-ҳунарларга ҳурмат ва меҳр руҳида тарбиялашда беқиёс аҳамиятга эгадир.

Шу маънода, бугун очилаётган ушбу фестивал санъат ва дўстлик, истеъдод ва маҳорат байрами сифатида барча иштирокчилар ва халқимиз қалбида ёрқин из қолдиради, деб ишонаман.

Сиз, ҳурматли фестивал қатнашчиларига сиҳат-саломатлик, олижаноб фаолиятингизда ютуқ ва омадлар, анжуман доирасидаги илмий-амалий конференсия ишига эса муваффақиятлар тилайман.

Хуш келибсиз, қадимий ва бетакрор Ўзбекистонга, хуш келибсиз, гўзал Қўқон шаҳрига!

Баёнотда айтилишича, Наманган вилоятининг Чуст туманида мактабгача таълим ташкилотидаги болалар билан содир бўлган заҳарланиш ҳолати юзасидан Соғлиқни сақлаш вазирлиги барча керакли чора-тадбирларни амалга оширмоқда.

Туман тиббиёт бирлашмасига қабул қилинган болаларнинг барчасига белгиланган стандартлар бўйича даво муолажалари олиб борилмоқда.

Уларга якуний ташхис қўйиш мақсадида белгиланган талаблар асосида намуналар олиниб, экспертизадан ўтказилмоқда.

Айни пайтда болаларнинг ҳолати қониқарли, улардан 10 нафарининг аҳволи яхшилангани сабабли уйига рухсат берилди.

Туманда содир бўлган ушбу ҳолат шахсан Соғлиқни сақлаш вазири томонидан қатъий назоратга олинган.

Мазкур ҳолат сабабларига ойдинлик киритилгач, қўшимча ахборот берилади, дейилади вазирлик расмий баёнотида (https://t.me/ssvuz/13987).

Бу Вазирлар Маҳкамасининг 2020 йил 19 ноябрдаги “Аҳолининг соғлом турмуш тарзини қўллаб-қувватлаш ва жисмоний фаоллигини оширишга доир қўшимча чора-тадбирлар тўғрисида”ги қарорига мувофиқ амалга оширилади.

“Автомобилсиз кун”ни ўтказишдан асосий мақсад автомобиллардан чиқаётган турли заҳарли газлар орқали атмосферанинг заҳарланишини камайтиришга ҳисса қўшиш, қолаверса, пиёда юриш ва велосипедда сайр қилишни кенг тарғиб этишдан иборат бўлиб, ўз навбатида, аҳоли орасида соғлом турмуш тарзини кенг оммалаштиришга хизмат қилади.

Республика Гидрометеорология хизмати агентлигининг хабар беришича, 22 сентябрь куни Тошкентда ҳаво ўзгариб туради, ёғингарчилик бўлмайди. Шарқдан секундига 5-10 метр тезликда шамол эсади. Кечаси 11-13, кундузи 21-23 даража илиқ бўлади.

Электрнинг қайта тикланувчи манбалар асосида ишлаб чиқарилганини тасдиқловчи “яшил энергия” сертификати тизими қуёш, шамол ва гидроэлектр станцияларида ишлаб чиқарилган электр учун жорий этилади.

Адлия вазирлигида “Қонун лойиҳаларини тайёрлаш, Вазирлар Маҳкамасига киритиш, Қонунчилик палатаси ва Сенат йиғилишларида ҳимоя қилиш” мавзусида семинар ўтказилди. Унда қонунчилик палатаси вакиллари томонидан қонун лойиҳаларини  кўриб чиқиш тартиби ҳамда лойиҳаларни киритишда эътибор қаратиш лозим бўлган жиҳатларга тўхтатиб ўтилди.

Хусусан, тўғридан-тўғри амал қиладиган қонун лойиҳаларини ишлаб чиқиш, муайян соҳани тартибга солишга қаратилган бир нечта қонун ўрнига яхлит кодекс ишлаб чиқиш лозимлиги қайд этилди.

Норма ижодкорлиги жараёнида қонунчилик ҳужжатлари ва лойиҳаларни тартибга солиш таъсирини баҳолашдан ўтказиш тизими жорий этилган. 2022 йилда 144 қонунчилик ҳужжати лойиҳасининг таъсири баҳоланиб, улардан 150 дан ортиқ талаб, мажбурият ва чеклов ўрнатувчи норма чиқариб ташланди. Натижада аҳоли ва тадбиркорлик субъэктлари учун 7 триллион сўмдан ортиқ асоссиз харажатларнинг олди олинди.

2026 йилга қадар 21 мингдан ортиқ ҳужжатни коррупсияга қарши экспертизадан ўтказиш белгиланган. 2022 йилда ушбу йўналишда 1,8 мингдан ортиқ ҳужжат экспертизадан ўтказилиб, уларнинг 12 фоизида 300 дан зиёд коррупсиявий омиллар аниқланди ҳамда уларни бартараф этиш бўйича тегишли қонунчилик ҳужжати лойиҳалари ишлаб чиқилди.

Келгусида қонунчилик ҳужжатлари ҳар йили ҳукумат томонидан тасдиқланадиган режалаштириш дастурлари асосида ишлаб чиқилади. Қонунчилик базасини янада ихчамлаштириш ва аниқ соҳалар кесимида тизимлаштириш мақсадида 57 соҳада 10 мингга яқин қонунчилик ҳужжати тизимлаштирилади.

Давлатимиз раҳбари ташаббуси билан бошланган янгиланиш ва қайта таъмирлаш ишлари Бухоро вилояти Когон тумани “Сорғун” маҳалла фуқаролар йиғинида ҳам давом этмоқда. Хайрли ташаббус ва саъй-ҳаракат тизимли равишда ишлаб чиқилган “Обод хонадон – обод кўча – обод маҳалла” дастури доирасида жадаллаштирилмоқда.

Дастурга мувофиқ “Сорғун” ва “Хўжа Якшаба” маҳалла фуқаролар йиғинларида амалга оширилган кенг кўламли ободонлаштириш ва қайта қуриш ишлари учун қарийб 33 миллиард сўм маблағ ҳисобига йўл-транспорт, муҳандислик–коммуникация тармоқлари, ижтимоий соҳа иншоотлари, бошқа бозор инфратузилма объектларини барпо этиш ва мукаммал таъмирлаш ишлари олиб борилмоқда.

– Маъмурий жиҳатдан Катта Орғун, Ойнасоз, Оқ олтин, Паракти, Сорғун, Сурхиён, Суғдиёна, Асалхўжа каби 8 та қишлоқдан таркиб топган маҳалламизда бугунга келиб 714 та хонадон, 819 та оила ва уларда истиқомат қилаётган аҳоли сони 3570 нафарга етган, – дейди “Сорғун” маҳалла фуқаролар йиғини раиси Бахтиёр Бекмуродов. –Ҳудудда 500 дан ошиқ пенсионер, нафақахўр бўлса, аҳолининг меҳнатга лаёқатли қатлами 1870 нафардан зиёд. Шулардан ҳозирда муқим иш ўрнига эга бўлгани 1757 нафарни ташкил этмоқда. Ишсиз эса расман 63 нафар бўлиб, жисмоний имконияти чекланган фуқаро сони 54 нафар, яна ижтимоий муҳофазага олинган ночор оила сони ўнга яқин. Қолаверса, бизда боқувчисини йўқотган ва якка-ёлғиз, қийин шароитда яшаётган ўндан ортиқ оилага меҳр-мурувват кўрсатилмоқда. Алоҳида тоифаланганларга келсак, 1 та оила “Темир дафтар”га киритилгани ҳолда 23 нафар йигит-қиз “Ёшлар дафтари”дан, 102 нафар фуқаро эса “Аёллар дафтари”дан ўрин олган.

Ҳудуддаги ободонлаштириш ва янгиланишни аввало ҳудуд муҳандислик-коммуникация тармоғининг такомиллаштирилаётгани, бундаги ижтимоий иншоотлар қиёфаси замонавий кўринишидан яққол билиш мумкин. Жумладан, ўз бағрига жами 560 нафар ўғил-қизни олган 7- ва 23-сонли умумтаълим мактаблари кейинги йилларда бутунлай янгидан таъмирланган, қўшимча қурилишлар бажарилган.

Инвестиция дастури асосида роппа-роса бир йил олдин пудратчи корхона “Галаосиё Сохтимон” МЧЖ томонидан бунёд қилинган 240 ўринли замонавий таълим даргоҳи биноси ва стандарт талабига кўра 12х18 метр ўлчамдаги спорт зали қурилишига қарийб 4 миллиард маблағ сарфланган. Мактабда иссиқлик тармоғи билан бирга барча синф хоналари, фан кабинетлари, ўқитувчилар хонаси рисоладагидек ҳозирланган. Бир йил олдин ҳудудда тиббиёт маскани бўлмаган, бугун эса сорғунликлар кунига 60 қатновга мўлжалланган оилавий шифохона пунктига эга бўлди.

Маҳаллада фойдаланишга топширилганига 3 йил тўлаётган 10-сонли давлат мактабгача таълим ташкилоти ҳозир 125 нафар жажжи болани ўз бағрига олган. Бу шинам муассаса пудратчи “Шавкат Мўмин” МЧЖ жамоаси томонидан умумий қиймати 2 миллиард 951 миллион сўм маблағ эвазига барпо қилинди.

Эътиборлиси, унда ишлашга қабул қилинган 31 нафар мутахассис ва ишчи-ходим маҳаллий аҳоли орасидан уйда ўтириб қолган ишсизлар, ижтимоий муҳофазага муҳтож хотин-қизлар орасидан танланган.

Ҳудуд инфратузилмасида рўй бераётган ўзгариш ва янгиликлар ҳам оз эмас. Чунончи, шу йилнинг ўтган ойларида Сорғун маҳалласидан ўтувчи “4K-182” Когон-Катта Орғун-Янглов-Қизилтепа йўлининг 3 километр қисми туман йўллардан фойдаланиш унитар корхонаси томонидан асфальтлаштирилган бўлса, ташкилот томонидан йўл чекка қисмларида аҳоли қатнови учун 2 километр масофада пиёдалар йўлакчаси барпо этилган. Бу лойиҳага давлат бюджети ҳисобидан 2 миллиард сўмга яқин маблағ сарфланган.

Шунингдек, Ойнасоз, Сорғун, Паракти, Сурхиён қишлоқлари бўйлаб ўтган ички йўллардан қиш ёғингарчиликларида ўтиб бўлмас даражага етган 1450 метр қисми шағаллаштирилган бўлиб, шундан 1240 метр қисмига асфальт бостирилган. Яна қишда лой, ёз жазирамасида чанги осмонга ўрлайдиган кўчаларнинг 2500 метр қисми эса бетонлаштирилгани шу ерлик аҳолини хурсанд қилди.

– Бошқа ҳудудда бўлгани каби сорғунликлар ҳам электр энергияси таъминотидаги узилишлардан четда қолмаган, – дейди туман электр тармоқлари идораси мутахассиси Элмурод Ҳамроев. – Ҳудудда 5,7 километр масофадаги электр линияси бутунлай янгиланди. Янги русумдаги “SIB” кабели тортилди. Эскирган симёғочлар ўрнига 130 та темир-бетон устун ўрнатилди. Катта Орғун қишлоғида 100 киловатт соат қувватга эга трансформатор ўрнига янги 250 киловатт соат қувватга эга электр трансформатор ўрнатилган. Мавжуд трансформаторларнинг 3 таси таъмирдан чиқарилган.

Сорғун табиий газ етиб бормайдиган ҳудудлардан бири. Шунинг учун бунда ҳам аҳоли кундалик эҳтиёжи учун “Когонгаз” таъминот бўлими томонидан ҳудуддаги истеъмолчилар, 734 та хонадонга суюлтирилган газ ёнилғиси маиший баллонларда узлуксиз етказиб берилмоқда. Сўнгги ойларда туманда ўтаётган мутасаддилар, сектор раҳбарлари сайёр қабулларида суюлтирилган газ баллони етишмовчилиги бўлган ўттизга яқин хонадонга маиший баллон етказилган.

Маҳалла аҳолисини ташвишга солаётган муаммолардан бири бу тоза ичимлик суви таъминотидир. Ўтган йили ёз ойларида биргина Сурхиён қишлоғида 11 минг метрдан ортиқ узунликда водопровод тармоғи ўрнатилгани туфайли 125 та хонадон истеъмолга яроқли тоза ичимлик сувидан баҳраманд бўлмоқда. Шундан сўнг ҳудудга яқин “Куржан” сув узатиш иншооти бултур “Обод қишлоқ” дастурига мувофиқ қайта реконструкция қилинди. Бу лойиҳа ва қишлоқдаги тармоқ қурилиши учун 600 миллион сўмдан ошиқ сармоя ўзлаштирилган. Эндиликда бошқа қишлоқларни ҳам водопроводлаштириш чора-тадбирлари кўрилаётир.

Умуман, ободлик ва янгиланишларни нафақат ҳудуд қиёфасида, балки ҳар бир оилада турмуш тарзи яхшиланаётгани мисолида ҳам кўриш мумкин.

Шу нуқтаи назардан, айни кунда ижтимоий муҳофазага муҳтож аҳоли қатлами билан ишлаш, улар ташвиш ва муаммоларини ечишга эътибор кучайтирилган.

Туман ҳокимининнг “Сорғун” маҳалла фуқаролар йиғинидаги ёрдамчиси Ислом Истамовнинг айтишича, жорий йилда “Ҳар бир оила–тадбиркор” дастури асосида эҳтиёжманд фуқаролар, ёш ташаббускорларга “Халқ банки” қўллаб-қувватловида уч йил муддатга, паст фоизда қайтариш шарти билан ҳар бири 33 миллион сўмгача миқдорда расмийлаштирилаётган сармоялар ўнлаб оилаларни соғломлаштириш, иқтисодий оёққа қўйиш, уларга ишлаб даромад орттириш имконини бермоқда.