Ҳукумат комиссиясининг тегишли баёни билан “Савдони ривожлантириш компанияси” АЖ томонидан тадбиркорлик субъектларини молиявий қўллаб-қувватлаш тизимига бир қатор муҳим ўзгартиришлар киритилди.
Янги қоидаларга кўра, 2026 йил 1 ноябрдан бошлаб кўргазмаларда миллий стенд таркибида ва xорижий ўқув семинарларида иштирок этиш, шунингдек, рақамли реклама жойлаштириш учун молиявий ёрдам олувчи корхоналарнинг бренди Интеллектуал мулк агентлигида мажбурий тартибда рўйхатдан ўтган бўлиши талаб этилади.
Шунингдек, 2027 йил 1 январга қадар ташқи савдо операциялари бўйича муддати ўтган дебитор қарздорлиги бўлмаслиги ҳақидаги талаб вақтинча бекор қилинди. 2027 йилдан эътиборан эса фақат Теxник жиҳатдан тартибга солиш агентлигининг онлайн реестридаги ва Давлат xаридлари портали орқали танлаб олинган малакали консалтинг ташкилотлари хизматидан фойдаланган тадбиркорларгагина сертификатлаштириш харажатлари учун молиявий ёрдам ажратилади.
Кўргазма ва бизнес-миссияларда иштирок этиш учун сўнгги 12 ойдаги экспорт ҳажми бўйича ҳам янги меъёрлар белгиланди: миллий стенд учун камида 100 минг АҚШ доллари ва xодимларнинг xорижий ўқув ҳамда бизнес-форумлардаги иштироки учун камида 50 минг АҚШ доллари миқдоридаги экспорт кўрсаткичи талаб қилинади. Бундан ташқари, миллий стендда қатнашувчи корхоналар ўз веб-сайтига эга бўлиши шарт.
Ажратилган маблағлардан самарали фойдаланиш ва мажбуриятларни бажариш юзасидан назорат кучайтирилди. Молиявий кўмак олган корхоналар белгиланган муддатларда (365 кун ёки 36 ой ичида) харажатларнинг камида 5 баробари миқдорида ёки 100 минг АҚШ долларидан кам бўлмаган маҳсулотни экспорт қила олмаса, ажратилган маблағлар 15 иш кунида тўлиқ қайтарилади ва БҲМнинг 20 баравари миқдорида жарима ундирилади. Шунингдек, тасдиқланган кўргазмада узрсиз сабабларга кўра иштирок этмаган ёки маҳсулот намуналарини юбормаган тадбиркорлар жаримага тортилиб, уларнинг Компания тадбирларидаги иштироки 6 ойга чекланади.
