Жиноят ишлари бўйича Шайхонтоҳур туман судида Тошкент шаҳар Давлат солиқ бошқармасининг собиқ бошлиғи Юнусжон Насимджанов ва Бош прокуратура ҳузуридаги Департаментнинг шаҳар бошқармаси бошлиғи собиқ ўринбосари Алишер Ганиевга нисбатан жиноят иши кўриб чиқилмоқда.
Юнусжон Насимджанов Жиноят кодексининг 167-моддаси 3-қисми “а” банди (ўзлаштириш ёки растрата йўли билан талон-торож қилиш) ҳамда 205-моддаси 2-қисми “а” банди (ҳокимият ёки мансаб ваколатини суистеъмол қилиш) бўйича айбланмоқда. У 2021 йилдан 2026 йил бошигача шаҳар солиқ бошқармасини бошқарган бўлиб, жорий йилнинг 27 январь куни Президент Шавкат Мирзиёев раислигида ўтказилган йиғилишдан сўнг эгаллаб турган лавозимидан озод этилган эди.
Алишер Ганиев эса Жиноят кодексининг 205-моддаси 2-қисми “а” банди ҳамда 223-моддаси 2-қисми “в”, “г” бандлари бўйича айбланмоқда. Уга нисбатан айрим тадбиркорларга солиқ тўлашдан бўйин товлаш бўйича кўрсатмалар берганлик айблови илгари сурилган. Мазкур йиғилишда Шайхонтоҳур тумани солиқ инспекцияси собиқ бошлиғи Ҳожиакбар Муллажоновнинг ҳам фаолиятини текшириш ва қонуний чора кўриш топширилган эди.
