Марказий банк бошқаруви 16 сентябрдаги йиғилишда асосий ставкани йиллик 14 фоиз даражасида сақлаб қолиш тўғрисида қарор қабул қилди.
Инфляция пасайишда давом этмоқда: август ойида умумий инфляция 6,2 фоизни, базавий инфляция эса 5,5 фоизни ташкил этди. Иқтисодиётда айрим мувозанатлашув белгилари кузатилаётганига қарамай, инфляцион кутилмаларнинг секин пасайиши, жаҳон хомашё ва энергия нархлари ҳамда тартибга солинадиган нархларнинг либераллашуви асосий хатарлар сифатида баҳоланмоқда. Ижобий реал фоиз ставкалари аҳолининг жамғариш фаоллигини қўллаб-қувватламоқда. Марказий банк инфляцияни 2027 йил якунига қадар 5 фоизлик мақсадли кўрсаткичга тушириш бўйича тегишли пул-кредит шароитларини таъминлаб боради. Асосий ставкани кўриб чиқиш бўйича навбатдаги йиғилиш 2026 йил 28 октябрь кунига белгиланган.
