Тошкентда АҚШ мустақиллигининг 250 йиллиги ва Ўзбекистон ҳамда АҚШ ўртасида дипломатик муносабатлар ўрнатилганининг 34 йиллигига бағишланган Freedom 250 Music Festival бўлиб ўтади.
Мазкур тадбир АҚШнинг Ўзбекистон бўйлаб ташкил этилаётган Freedom 250 лойиҳаси доирасида ўтказилади. Тошкент ушбу маданий дастурнинг навбатдаги манзили бўлади.
Фестиваль доирасида америкаликларнинг инновация, бизнес, таълим ва маданиятига бағишланган тадбирлар ташкил этилади.
Мусиқа дастуридан АҚШ Ҳарбий-ҳаво кучлари Марказий қўмондонлиги (AFCENT) бенди, DJ King Macarella ҳамда ўзбекистонлик хонанда Руҳсора Эмнинг жонли чиқишлари ўрин олган.
Freedom 250 лойиҳасининг аввалги тадбирлари Хоразм ва Самарқандда ўтказилган. Тошкентдаги фестиваль эса лойиҳанинг навбатдаги йирик маданий тадбири сифатида белгиланган.
