Тошкент шаҳрида ЙҲХБ ходимларининг транспорт воситасини тўхтатиш ҳақидаги қонуний талабига бўйсунмаган мотоциклчига нисбатан маъмурий чора кўрилди.
Ҳодиса «Янги Ўзбекистон» боғи яқинидаги йўлда содир бўлган. Мотоциклчи инспекторларнинг тўхташ талабига бўйсунмай, юқори тезликда ҳаракатини давом эттирган. Ушбу ҳолат акс этган видеонинг ўзи ижтимоий тармоқларга жойлаган.
ЙҲХБ ходимлари видеони ўрганиб, ҳайдовчининг шахсини аниқлаган. Ҳолат юзасидан тегишли ҳужжатлар расмийлаштирилиб, иш судда кўриб чиқилган.
Суд қарорига кўра, мотоциклчига 15 сутка маъмурий қамоқ жазоси тайинланган.
Шунингдек, ҳайдовчида фақат «B» тоифали ҳайдовчилик гувоҳномаси борлиги аниқланган. Мотоцикл бошқариш учун эса «A» тоифали гувоҳнома талаб этилади.
Ҳайдовчининг зарур тоифага эга эмаслиги билан боғлиқ қўшимча чоралар ҳам қонунчиликда белгиланган тартибда кўриб чиқилиши мумкин.
