АҚШ Қозоғистондаги вольфрам конларини ўзлаштириш бўйича келишув тузди. Музокаралар жараёнида АҚШ президенти Дональд Трампнинг ўғиллари лойиҳа операторига айланадиган компанияга сармоя киритган.
The New York Times нашрининг ёзишича, Дональд Трампнинг ўғиллари — Дональд Трамп кичик ва Эрик Трамп, шунингдек, АҚШ савдо вазири Ҳовард Лютникнинг фарзандлари давлат томонидан қўллаб-қувватланаётган тоғ-кон лойиҳалари орқали молиявий манфаат кўраётган бўлиши мумкин.
Нашр мисол сифатида 2025 йил ноябрь ойида эълон қилинган АҚШ ва Қозоғистон ўртасидаги мамлакатдаги энг йирик икки вольфрам конини ўзлаштириш келишувини келтиради. Лойиҳанинг 70 фоизи АҚШнинг инвестиция компаниясига, 30 фоизи эса Қозоғистоннинг «Тау-Кен Самруқ» компаниясига тегишли.
Маълум қилинишича, келишув эълон қилинишига бир неча ой қолганда Трамп ўғиллари ҳаммуассисларидан ҳисобланган Dominari Securities компанияси зарар билан ишлаётган Skyline Builders компаниясини сотиб олган. Кейинчалик мазкур компания лойиҳа оператори бўлган Cove Kaz Capital компаниясининг 20 фоиз улушини харид қилган.
Кейинги корпоратив ўзгаришлардан сўнг компания Kaz Resources номи билан биржада жойлаштирилди. Шу вақтга келиб, у Қозоғистондаги вольфрам лойиҳаси оператори сифатида АҚШ федерал бюджети ҳисобидан 1,6 миллиард доллар маблағ олиши маълум бўлган.
The New York Times таъкидлашича, бу ҳолат инвесторларга, жумладан Трамп ўғилларига, вольфрам қазиб олиш бошланишидан олдин ҳам катта даромад олиш имконини беради.
Нашрга кўра, Ҳовард Лютникнинг фарзандлари ҳам ушбу битимдан фойда кўрган. Улар ҳаммуассисларидан бири ҳисобланган Cantor Fitzgerald инвестиция компанияси мазкур лойиҳага сармоя жалб қилишда иштирок этган.
Айни пайтда АҚШдаги демократлар Конгрессни Трамп оиласининг мазкур битимдаги эҳтимолий манфаатлар тўқнашувини текширишга чақирмоқда.
Оқ уй ва АҚШ Савдо вазирлиги эса Трамп маъмурияти давлат қарорларини оилавий бизнес манфаатлари билан аралаштиргани ҳақидаги иддаоларни рад этмоқда.
