Франциянинг Voltalia компанияси билан ҳамкорликда амалга оширилаётган агровольтаик лойиҳа доирасида қуввати 500 киловатт бўлган қуёш электр станцияси қурилишига старт берилди.
Шу муносабат билан ташкил этилган тадбирда Энергетика вазирлиги, Қишлоқ хўжалиги вазирлиги, Қишлоқ хўжалигида билим ва инновациялар миллий маркази, Сабзавот-полиз экинлари ва картошкачилик илмий-тадқиқот институти вакиллари ҳамда «Voltalia» компаниясининг бош ижрочи директори Роберт Клейн иштирок этди.
Мазкур пилот лойиҳа доирасида қуёш панеллари ўрнатилиб, электр энергияси ишлаб чиқариш йўлга қўйилади. Тадбир давомида лойиҳани амалга ошириш босқичлари, уни республика ҳудудларида кенгайтириш имкониятлари ва келгусидаги вазифалар муҳокама қилинди.
Шунингдек, иштирокчилар қурилиш майдонида қуёш панелларини ўрнатиш ишларига рамзий старт бериб, экологик ташаббусни қўллаб-қувватлаш мақсадида манзарали дарахт кўчатларини экишди.
