Россия Федерацияси қишлоқ хўжалиги назорати хизмати 30 майдан бошлаб Арманистондан янги узилган сабзавот ва резавор маҳсулотлар импортига чеклов киритилишини маълум қилди.
Қарорга мувофиқ, помидор, бодринг, қалампир, кўкатлар ҳамда қулупнай каби маҳсулотларнинг Россияга киритилиши вақтинча тўхтатилади. Тегишли чекловлар фитосанитар хавфсизликни таъминлаш ва етказиб берилаётган маҳсулотлар устидан назорат тизимини такомиллаштириш бўйича ягона механизм ишлаб чиқилгунига қадар амал қилади.
Ведомство маълумотига кўра, бундай қарор Арманистондан келаётган мева-сабзавот маҳсулотлари партияларида қоидабузарлик ҳолатлари кўпайгани сабабли қабул қилинган. Шу муносабат билан фитосанитар талабларга мувофиқликни таъминлаш мақсадида қўшимча текширув ва назорат чоралари кучайтирилмоқда.
Чеклов вақтинчалик характерга эга экани ва етказиб бериш тизимидаги хавфсизлик алгоритмлари мувофиқлаштирилгандан сўнг қайта кўриб чиқилиши мумкинлиги қайд этилган.
