Қозоғистон бокс бўйича эркаклар терма жамоанинг барча мураббийларини лавозимидан озод қилди. Бу ҳақда «Tengri News» хабар бермоқда.
Маълум бўлишича, Қозоғистонда бокс бўйича эркаклар терма жамоаси мураббийлар штаби ишдан бутунлай четлатилган ва бу қарор Қозоғистон бокс федерацияси қарори Спорт қўмитаси билан келишилган ҳолда қабул қилинган.
Шу тариқа, Бош мураббий Мирзагали Айтжанов ва мураббийлар штаби таркибидан 10 нафар мутахассис ҳамда Қозоғистон бокс федерацияси вице-президенти Азиз Кожамбетов ўз лавозимини тарк этди.
Бокс бўйича Қозоғистон Республикасида хизмат кўрсатган мураббий Турсингали Эдилов эса бокс федерацияси президенти маслаҳатчиси лавозимига тайинланган.
Янги мураббийлар штаби ҳозирча тўлиқ таркибда маълум эмас. Мазкур қарорлар катта эҳтимол билан Париж олимпиадасидаги муваффақиятсизликлар билан боғлиқ.
Қайд этиш керакки, қўшниларимизнинг Париждаги медаллари бир кумуш ва бир бронзадан иборат. Кумуш медални 24 ёшли Нурбек Оралбай, бронзани эса Нозим Қизайбай олиб келганди.
