Универсал мутахассислар: Ўзбекистонда мультимедиа журналистларининг янги авлоди тарбияланади
Тошкентда Рене Фалкнер, Борис Максудов, Бахтиёр Турахонов ва бошқа етакчи мутахассислар бошчилигида ёш журналистларнинг медиа-курслари бошланади,иштирокчилар кастинг асосида танлаб олинади. Ўқув машғулотлари ЎзЭОАВМА, қатор маҳаллий телеканаллар ва Ёшлар ишлари агентлиги томонидан ташкил этилмоқда.
Кастинг пойтахтимиздаги Ёшлар ижод саройида ўтаётган “Янги Ўзбекистон. Янги нигоҳ ” медиаҳафталиги доирасида бўлиб ўтади.
Умумий ҳисобда 100 нафар йиғит-қизлар танлаб олиниб, улар медиа соҳасидаги бир қатор касблар бўйича чуқур ўқув курсларида таълим олишади. Курсларни бошлашдан олдин уларга керакли жиҳозларнинг тўлиқ тўплами — камера, компьютер берилади.
Эътиборлиси, жорий йилнинг сентябрь ойигача давом этадиган курсда талабалар стипендия олишади.
Ёшлар кўп форматли медиа-контент яратиш бўйича билим ва кўникмаларга эга бўлишади. Улар телевидение репортажларини суратга олишни, блог юритишни, ахборот сайтлари учун мультимедиа материалларини тайёрлашни ва радиосюжетлар тайёрлашни ўрганишади. Курсларни тугатгандан сўнг, ёшлар универсал медиажурналист сифатида фаолият олиб боришлари мумкин.
Курсларда етакчи телеканалларнинг мутахассислари педагог вазифасини бажариб, SMM ва PR, монтаж, видео тасвирга олишнинг хусусиятлари ва сирлари, ахборот дастурларини тайёрлаш, ток-шоуларни яратиш бўйича мутахассисларни тайёрлашади. Ёшлар ўзларининг амалий кўникмаларини пойтахтдаги давлат ва нодавлат телеканалларининг студияларида ривожлантириш имкониятига эга бўлишади.
Лойиҳанинг биринчи босқичида медиа-курслар Тошкентда ўтказилади. Иккинчи босқичда Ўзбекистоннинг бошқа ҳудудларидан ёшлар танлаб олинади. Ҳар бир вилоятдан 10 нафардан ёшларни танлаб олиш режалаштирилган.
