Президент Шавкат Мирзиёев Ўзбекистон Республикаси давлат мустақиллигининг 35 йиллигига бағишланган тантанали маросимда нутқ сўзлади.
Давлат раҳбари халқни Мустақиллик байрами билан табриклаб, мамлакатнинг энг улуғ байрами Янги Тошкентда ўтказилаётгани тантана шукуҳини янада ошираётганини таъкидлади.
Келгусида илм-фан, таълим ва маданият марказига айланиши кўзда тутилган Янги Тошкентда қатор йирик объектлар ишга туширилди. Жумладан, Яқинда Янги Ўзбекистон университети, Низомий номидаги Ўзбекистон Миллий педагогика университети ҳамда Ўзбекистон миллий кутубхонасининг янги бинолари фойдаланишга топширилди.
Тантана иштирокчилари ҳузурида очилиши режалаштирилган фаввора ҳам байрам дастурининг муҳим қисми бўлди. У дунёдаги энг баланд мусиқали фаввора сифатида «Гиннесснинг рекордлар китоби»дан жой олгани қайд этилди.
Президент Янги Тошкентда халқ ҳаётидаги яна кўплаб қувончли ва тарихий воқеаларга гувоҳ бўлишини таъкидлади.
«Бир неча юз йиллик орзулар рўёбга чиқаётган ушбу бетакрор маконда бутун халқимиз билан ҳали яна кўплаб қувончли ва тарихий воқеаларга гувоҳ бўламиз.
Аминманки, Янги Тошкент пойтахтимизнинг кўркига кўрк қўшиб, биз барпо этаётган Янги Ўзбекистоннинг куч-қудратини намоён этадиган чинакам тараққиёт марказига айланади», — деди Шавкат Мирзиёев.
