Чирчиқда 17 ёшли ўсмир иштирокида жиддий ҳодиса содир бўлди
Маълумотларга кўра, ҳодиса 1 апрель куни Бозсу темир йўл станциясида юз берган.
Ўсмир дўстлари билан бирга селфи қилиш мақсадида вагон томига чиққан. Шу вақтда у электр токи таъсирига учраган — сабаб контакт тармоғидаги юқори кучланиш бўлган. Дастлабки маълумотларга кўра, электр ёйи ҳосил бўлиб, оғир оқибатларга олиб келган.
Натижада йигит танасининг тахминан 85 фоизи куйган. У зудлик билан шифохонага ётқизилган ва ҳозирда реанимация бўлимида. Жабрланувчининг аҳволи ўта оғир деб баҳоланмоқда.
Ушбу ҳолат яна бир бор темир йўл вагонлари устида бўлишнинг ўта хавфли эканини кўрсатмоқда: ҳатто симларга бевосита тегмасдан ҳам юқори кучланиш электр ёйини ҳосил қилиб, оғир жароҳатлар ёки ҳалокатга олиб келиши мумкин.
