Ўзбекистонда спорт тиббиёти тизимини кенг қамровли ислоҳ қилиш режалаштирилмоқда. Энди спортчиларни тиклаш, диагностика ва уларнинг ҳолатини назорат қилиш ишлари хорижий клиникаларга мурожаат қилмасдан, мамлакат ичида ривожлантирилади.
Бу ташаббусни Шавкат Мирзиёев жисмоний тарбия ва спортни ривожлантиришга бағишланган видеоселектор йиғилишида илгари сурди. У ҳозирда кўплаб тиббий хизматлар — текширувлардан тортиб оғир жароҳатларни даволашгача — хорижда амалга оширилаётганини таъкидлади. Малакали кадрлар етишмаслиги сабабли спорт федерациялари хорижлик мутахассисларни жалб қилишга мажбур.
Шунингдек, синишлар ва боғламлар узилиши каби жароҳатларни даволаш бўйича замонавий протоколлар тўлиқ жорий этилмагани, профиль муассасалар эса спорт ташкилотлари билан етарли даражада ҳамкорлик қилмаётгани қайд этилди.
Ислоҳотлар доирасида ихтисослаштирилган тиббиёт марказлари спорт федерациялари билан яқин ҳамкорликда ишлайди. Миллий терма жамоалар учун мунтазам диагностика, жароҳат хавфини баҳолаш, жисмоний юкламалар таҳлили ва илмий асосланган тавсиялар жорий этилади.
Янги ўқув йилидан Тошкент тиббиёт академиясида спорт диетологлари, физиологлар ва психологлар тайёрлаш бошланади. Фармацевтика институти эса соғлом овқатланиш мутахассисларини тайёрлайди. Талабалар учун амалий база сифатида Олимпия шаҳарчасида жойлашган Илмий спорт тиббиёти маркази хизмат қилади.
Ушбу чора-тадбирлар спортчилар тайёргарлиги самарадорлигини ошириш ва мамлакатда замонавий спорт тиббиёти инфратузилмасини ривожлантиришга қаратилган.
