Тошкентда ИИВ ва ДХХ ходимлари пойтахт олий ўқув юртлари талабаларидан иборат гуруҳнинг интернет орқали наркотиклар тарқатиш фаолиятига чек қўйди. Тезкор тадбирлар давомида 1,6 кг дан ортиқ тақиқланган моддалар, жумладан «альфа-ПВП», мефедрон, марихуана ва кучли таъсир қилувчи препаратлар мусодара қилинди.
Миробод туманида сўнгги уч ой давомида Telegram орқали йирик миқдорларда наркотик тарқатиб келган 21 ёшли талаба қўлга олинди. Унинг ижарадаги хонадондан 690 г «альфа-ПВП», 471 г мефедрон, 433 г марихуана, электрон тарозилар, қўплаш материаллари ва номаълум суюқликлар топилди.
Яккасарой туманида интернет орқали наркотик савдоси билан боғлиқ бўлган икки нафар эркак тўхтатилди. Уларда «альфа-ПВП», «Тропикамид» ва наркотик истеъмоли учун мосламалар аниқланди.
Шунингдек, Қибрай туманида 20 ёшли қиздан 5 дона «Тропикамид» мусодара қилинди, илгари судланган интернет-дўкон операторидан эса 80 г «альфа-ПВП», мефедрон, «Прегабалин», электрон тарозилар ва қўплаш материаллари топилди.
Фарғона вилояти Данғара туманида эса икки нафар шахс 7 кг гашишни мусодара қилиш чоғида қўлга олинди. Маълум бўлишича, улардан бири мазкур моддани трансмиллий жиноий гуруҳ кўрсатмасига кўра олдиндан келишилган жойга қолдирган.
Барча ҳолатлар юзасидан жиноят ишлари қўзғатилиб, тергов ишлари олиб борилмоқда.
