1 июндан бошлаб Тошкентдаги барча янги қурилиш объектлари (якка тартибдаги уйлардан ташқари) мажбурий экологик экспертизадан ўтказилади ҳамда ҳаво фонини мониторинг қилиш станциялари ва Экология қўмитаси маълумотлар базаси билан интеграция қилинган онлайн-камералар билан жиҳозланади.
Баландлиги 12 метрдан ортиқ ва майдони 500 кв. мдан катта бўлган бинолар учун атроф ҳудудни кўкаламзорлаштиришга камида 30 фоиз майдон ажратилиши шарт. Шунингдек, қурилиш чиқиндиларини йиғиш, олиб чиқиш ва қайта ишлаш тизимини йўлга қўйиш режалаштирилган, жумладан Янги Тошкент объектларида ҳам.
Ёз ва куз мавсумида шаҳарнинг марказий кўчаларида кунига икки марта махсус техника ёрдамида сув сепилади, қум ва чанг тозаланади.
Бундан ташқари, пойтахтда умумий узунлиги 61,3 км бўлган ариқлар тизими тикланади, ягона оператор яратилади, тизим рақамлаштирилади ва мониторинг билан жиҳозланади. Ариқлардан олинадиган сув кўчалар ва яшил ҳудудларни суғоришда қайта фойдаланилади.
2027 йил 1 октябргача Тошкент ва вилоятда намлик паст бўлган ҳудудларда сунъий ёмғир ва шамол чақириш ускуналари ўрнатилади. Шунингдек, 150 км ёпиқ дренаж тармоғи барпо этиш ва мавжуд 197 км канал ҳамда коллекторларни таъмирлаш режалаштирилган.
Кўп қаватли уйлар учун томларни иссиқлик изоляцияси мақсадида базальт билан қоплаш бўйича тажриба ўтказилади. Синовлар муваффақиятли якунланса, ушбу технология меъёрий ҳужжатларда мустаҳкамланади.
Ушбу чора-тадбирлар 2026–2030 йилларга мўлжалланган «Тоза ҳаво» умуммиллий лойиҳаси доирасида амалга оширилиб, пойтахтда ҳаво сифати ва экологик ҳолатни яхшилашга қаратилган.
