Президент Шавкат Мирзиёев раислигида фуқаролар мурожаатлари билан ишлаш тизимини такомиллаштиришга бағишланган видеоселектор йиғилиши бошланди.
Қайд этилганидек, Ўзбекистон аҳолиси сони 38 миллион нафардан ошди, меҳнатга лаёқатли фуқаролар сони эса 20 миллиондан ортиқни ташкил этмоқда. Шу билан бирга, сўнгги тўққиз йилда аҳоли даромадлари икки баробарга ошди.
Одамларнинг муаммоларини ҳал қилиш ва уларнинг мурожаатларига тезкор жавоб бериш мақсадида вазирлар ва ҳокимлар маҳаллаларда бевосита ишлайдиган тизим яратилди. 2026 йилда маҳаллаларда аҳоли турмуш шароитини яхшилаш учун 56 триллион сўм йўналтириш режалаштирилган.
Президент мавжуд имкониятлардан фуқаролар муаммоларини ҳал қилишда қай даражада самарали фойдаланилаётгани ҳақида раҳбарлар ўйлаб кўриши кераклигини таъкидлади.
«Тўққиз йил аввал Ўзбекистон Президентининг Халқ қабулхоналари ташкил этилганда, ягона мақсад — давлат органларини халққа яқинлаштириш эди. Албатта, Халқ қабулхоналари ўз вақтида самарали ишлади. Аммо бугун жамиятнинг замонавий талабларини ҳисобга олган ҳолда ушбу тизимни ислоҳ қилиш вақти келди», — деди давлат раҳбари.
Президент сўзларига кўра, энди «ҳар бир инсон ва ҳар бир оиланинг муаммосини билиш ва уларга ўз вақтида ёрдам бериш» тамойили туман, шаҳар ва вилоят ҳокимлари, вазирлар ҳамда уларнинг ҳудудий бўлинмалари раҳбарлари фаолиятининг асосий қоидасига айланиши керак.
