Сирдарё вилоятида Мирзаобод тумани Кадастр агентлиги бўлими бош инспектори турар жой уйи учун кадастр ҳужжатларини расмийлаштириб бериш эвазига пора олганликда гумон қилиниб, қўлга олинди.
Тергов маълумотларига кўра, мансабдор шахс 49 ёшли фуқарога зарур кадастр ҳужжатларини тезкор тайёрлаб беришни ваъда қилган ва бу хизматини 1,5 минг долларга баҳолаган.
Ушлаш амалиёти Ўзбекистон Давлат хавфсизлик хизмати ходимлари ҳамда Бош прокуратура ҳузуридаги Иқтисодий жиноятларга қарши курашиш департаменти томонидан ўтказилган қўшма тадбир давомида амалга оширилди. Гумонланувчи пулнинг асосий қисми топширилаётган пайтда қўлга олинган.
Ашёвий далил сифатида ундан 1000 доллар ва 6 миллион 50 минг сўм маблағ мусодара қилинди.
Мазкур ҳолат юзасидан жиноят иши қўзғатилди. Инспекторнинг ҳаракатлари Жиноят кодексининг 168-моддаси 3-қисми “в” банди (хизмат мавқеидан фойдаланиб содир этилган фирибгарлик), шунингдек пора беришга шериклик учун жавобгарликни назарда тутувчи 28 ва 211-моддалар бўйича малакаланди.
Тергов даврида гумонланувчига нисбатан қамоққа олиш тарзидаги эҳтиёт чораси қўлланди. Ҳуқуқни муҳофаза қилувчи органлар ҳодиса билан боғлиқ барча ҳолатларни аниқлаш ишларини давом эттирмоқда.
