Тошкентда Ўзбекистон Давлат хавфсизлик хизмати ходимлари Бош прокуратура ҳузуридаги Иқтисодий жиноятларга қарши курашиш департаменти билан ҳамкорликда Тошкент шаҳри Яшнобод тумани ҳокимиятининг икки нафар мансабдор шахсини товламачилик гумони билан қўлга олди.
ДХХ матбуот хизмати маълумотига кўра, дастлаб фуқаролар йиғинидан бирининг ҳоким ёрдамчиси ушланган. У тадбиркордан кўп қаватли уйнинг биринчи қаватида жойлашган квартирании турар жой фондидан нотурар жой тоифасига ўтказиш учун рухсат олишга ёрдам бериш эвазига 5 минг доллар талаб қилган. Шу билан бирга, амалдор юқори лавозимли танишлари борлигини айтиб, ўз алоқаларига ишора қилган.
Кейинги текширувлар давомида маълум бўлишича, масалани ҳал қилишда туман ҳокимияти бўлимларидан бирининг раҳбари ҳам иштирок этиши керак бўлган. Тезкор тадбир доирасида ушбу амалдор 600 доллар олаётган вақтида қўлга олинган.
Ҳар икки гумондорга нисбатан жиноят ишлари қўзғатилган, уларга нисбатан қамоққа олиш тарзидаги эҳтиёт чораси қўлланган. Тергов ҳаракатлари давом этмоқда.
Бундан аввал ҳам Ўзбекистон Давлат хавфсизлик хизмати ходимлари Ўзбекистон Олий таълим, фан ва инновациялар вазирлигининг етакчи мутахассисини катта миқдорда пора олаётган вақтида қўлга олган эди. Тергов маълумотига кўра, у нодавлат олий ўқув юрти вакилига Сурхондарё вилоятида филиал очишда ёрдам беришни ваъда қилган.
