Адлия вазирлиги ҳамда Рақамли технологиялар вазирлигининг қўшма қарори билан интеллектуал мулкдан қонунга хилоф равишда фойдалангани сабабли фаолияти чекланган веб-сайтлар ҳақидаги маълумотларни халқаро платформага киритиш тартиби тасдиқланди.
Мазкур платформа Бутунжаҳон интеллектуал мулк ташкилоти томонидан юритилади ва унга аъзо давлатлар муаллифлик ҳуқуқи бузилгани аниқланган сайт ҳамда иловалар тўғрисидаги ахборотни жойлаштиради.
Маълумотларга кўра, 2024–2025 йиллар давомида муаллифлик ва турдош ҳуқуқлар бузилгани сабабли 128 та веб-сайт ваколатли орган томонидан чекланган.
Янги тартибга мувофиқ, ҳуқуқбузар сайтлар ҳақидаги маълумотлар тадбиркорлар ва реклама агентликларига етказилади, ноқонуний манбалар орқали реклама жойлаштиришнинг олди олинади ҳамда компаниялар бренди ва ишбилармонлик обрўси ҳимоя қилинади.
