Берлин шаҳрида ўтказилган халқаро туризм кўргазмаси доирасида Ўзбекистон делегацияси қатор нуфузли халқаро ташкилотлар ва бизнес вакиллари билан икки томонлама учрашувлар ўтказди. Мулоқотларда мамлакат туризм салоҳиятини кенг тарғиб қилиш ва туристик оқимни ошириш масалалари муҳокама қилинди.
Озарбайжон Давлат туризм агентлиги раҳбарияти билан учрашувда амалий ҳамкорликни кенгайтириш, янгиланган ўзаро англашув меморандумини имзолашга тайёргарлик ва қўшма маркетинг ташаббусларини амалга ошириш бўйича келишувга эришилди. Шунингдек, ўзаро танишув сафарлари, туроператорлар ўртасидаги алоқаларни мустаҳкамлаш ҳамда Европа ва Жануби-Шарқий Осиё бозорларига мўлжалланган қўшма йўналишлар ишлаб чиқиш масалалари кўриб чиқилди.
Йирик халқаро сайёҳлик платформаси раҳбарияти билан музокараларда Ўзбекистонни рақамли майдонда фаол тарғиб қилиш, қўшма маркетинг кампанияларини йўлга қўйиш ва мамлакат учун махсус саҳифа яратиш имкониятлари муҳокама қилинди.
Халқаро конгресслар ва анжуманлар соҳасида фаолият юритувчи ташкилот билан учрашувда мамлакатда ишбилармонлик туризмини ривожлантириш, халқаро тадбирларни жалб қилиш ва таҳлилий инструментлардан фойдаланиш масалаларига эътибор қаратилди. Хива шаҳридаги янги мажмуани йирик анжуманлар ўтказиш маскани сифатида илгари суриш бўйича маслаҳатлашувларни давом эттиришга келишилди.
Шунингдек, Швейцария меҳмонхона бошқаруви мактаби вакиллари билан меҳмондўстлик соҳаси учун замонавий кадрлар тайёрлаш, амалий таълим дастурларини жорий этиш ва Самарқанд шаҳридаги халқаро туризм академияси билан ҳамкорликни ривожлантириш масалалари муҳокама қилинди.
Мутахассислар фикрича, бундай учрашувлар Ўзбекистоннинг халқаро туризм бозоридаги нуфузини мустаҳкамлаш ва уни рақобатбардош сайёҳлик йўналиши сифатида илгари суришга хизмат қилади.
