Бугун эрталаб Тошкентда ҳаво сифати яна хавфли даражага етди — ифлосланиш кўрсаткичлари Жаҳон соғлиқни сақлаш ташкилоти (ВОЗ) тавсия этган меъёрлардан 21 баробар юқори қайд этилди. Экологик вазият айниқса болалар, кексалар ва нафас йўллари сурункали касалликларига чалинган фуқаролар саломатлиги учун зарарли деб баҳоланмоқда.
Аввалроқ «Ўзгидромет» маълум қилишича, ҳаво сифати кескин ёмонлашуви ноқулай метеошароитлар билан боғлиқ. Шамолсизлик ва ҳарорат инверсияси ифлословчи моддаларнинг атмосферанинг ерга яқин қатламида тўпланишига сабаб бўлмоқда. Натижада зарарли заррачалар ҳавода узоқроқ сақланиб қолмоқда.
Синоптиклар кун давомида ёғингарчилик бўлишини прогноз қилмоқда. Кутилишича, ёмғирлар ҳавони қисман тозалаб, пойтахтдаги экологик ҳолатни бир қадар яхшилайди.
