Ўғриланган автомобилдаги ўсмир томонидан уриб юборилиб, вафот этган кичик сержант Хосилбек Эшназаровнинг оиласи давлатнинг тўлиқ ҳомийлигига олинади.
Бу ҳақда Ички ишлар вазирлиги ахборот хизмати расмий баёнот тарқатди. Унда марҳумнинг ота-онаси ва вояга етмаган уч нафар фарзандига зарур ёрдам ва қўллаб-қувватлаш кўрсатилиши таъкидланган.
Фожеа 25 февраль куни Нукус кўчасида содир бўлган. 33 ёшли инспектор хизмат вазифасини бажараётган вақтда юқори тезликда ҳаракатланган ўсмир томонидан уриб юборилган. Шифокорларнинг барча саъй-ҳаракатларига қарамасдан, у икки кундан сўнг шифохонада вафот этди.
Хосилбек Эшназаров 2022 йилда ички ишлар органларида хизмат фаолиятини бошлаган. Қисқа вақт ичида у масъулиятли ва фидойи ходим сифатида танилган. Патруль-пост ва йўл-патруль хизматларида фаолият юритган йиллари давомида у мингдан ортиқ ҳуқуқбузарликни аниқлаган, жумладан юзлаб қўпол ЙҲҚ бузилишларини фош этган ҳамда маст ҳолатдаги 14 нафар ҳайдовчини ушлаган. Ҳамкасблари уни пойтахтдаги оммавий тадбирлар пайтида жамоат тартибини таъминлашга қўшган ҳиссаси учун алоҳида эътироф этган.
Вояга етмаган гумонланувчига нисбатан транспорт воситасини қонунга хилоф равишда эгаллаш ҳамда одам ўлимига сабаб бўлган қасддан оғир тан жароҳати етказиш моддалари билан жиноят иши қўзғатилган. У қамоққа олинган, тергов ҳаракатлари эса Бош прокуратуранинг алоҳида назоратига олинган.
