Британиянинг машҳур люкс автомобил ишлаб чиқарувчиси — Aston Martin яна 20 фоиз ходимини қисқартиришини маълум қилди. Қарор компаниянинг йиллик молиявий натижалари кутилгандан ҳам ёмонроқ бўлгани фонида қабул қилинган.
Компания маълумотига кўра, заиф талаб ва тариф босимлари молиявий кўрсаткичларга салбий таъсир кўрсатган. Айниқса, АҚШда жорий этилган квотага асосланган божхона тизими ишлаб чиқарувчи томонидан «ўта издан чиқарувчи» деб баҳоланган. Шу билан бирга, компания учун асосий бозорлардан бири бўлган Хитойда талаб «жуда суст» экани қайд этилган.
Бу — сўнгги бир йил ичида амалга оширилаётган иккинчи қисқартириш тўлқини бўлиб, компания учун оғир давр кечаётганини тасдиқлайди. 1,38 миллиард фунт стерлинг (тахминан 1,87 миллиард доллар) миқдоридаги қарз юки ва пул оқимини барқарор таъминлашдаги муаммолар молиявий ҳолатга босим ўтказишда давом этмоқда. Бу ҳолат такрорий капитал қўйилмаларига қарамай сақланиб қолмоқда.
James Bond автомобили сифатида кенг танилган бренд 2026 йилда ҳам пул чиқимлари давом этишини кутмоқда. Шу билан бирга, компания кейинги йилларда молиявий ҳолат яхшиланишига умид билдирган.
