Қараганда шаҳрида жанг санъати бўйича ўтказилган турнирдан сўнг 18 ёшли спортчи оғир бош жароҳати олиб, комага тушди. Ҳолат юзасидан полиция томонидан тергов ҳаракатлари бошланган, деб хабар берди NUR.KZ.
Фожиали воқеа ҳақида спортчининг синглиси Threads ижтимоий тармоғида маълум қилган. Унинг айтишича, 2026 йил 14–15 февраль кунлари Қарағанда жекпе-жек (қоидаларсиз жанг) бўйича турнир бўлиб ўтган.
Биринчи куни Арслан икки жанг ўтказиб, ғалаба қозонган. Аммо кейинги куни, синглисининг таъкидлашича, жанг вақтида рақиб тақиқланган усулни қўллаб, уни боши билан пастга қарата кучли равишда ерга урган.
Шундан сўнг спортчи зўрға ўрнидан турган, бошини ушлаб, ҳолати издан чиққан ҳолда бўлган. Шунга қарамай, жанг тўхтатилмаган.
Иккинчи раунд якунланганидан сўнг, яқинларининг сўзларига кўра, Арслан ҳушидан кетиб, ерга йиқилган ва хириллай бошлаган. У тўғридан-тўғри рингда комага тушган. Ҳодиса видеоёзувга туширилгани ва ижтимоий тармоқларда эълон қилингани айтилмоқда.
Шифохонада унга “бош миясининг посттравматик қон қуйилиши, оғир даражадаги мия лат ейиши, чап ярим шарда ўткир субдурал гематома, мия шиши, 2–3 даражали кома” ташхислари қўйилган. Спортчи зудлик билан жарроҳлик амалиётини бошдан кечирган. Айни пайтда унинг аҳволи ўта оғир деб баҳоланмоқда. Оила аъзолари ҳуқуқни муҳофаза қилувчи органларга мурожаат қилган.
