«Ўзбеккосмос» — Ўзбекистон Космик тадқиқотлар ва технологиялар агентлиги биринчи ўзбек космонавтини танлов асосида аниқлаш ниятида. Бу ҳақда агентлик директори ўринбосари Мухиддин Иброҳимов «Ўзбекистон 24» телеканалига берган интервьюсида маълум қилди.
Унинг айтишича, танлов очиқ тарзда ўтказилади ва истаган ҳар бир киши унда иштирок этиши мумкин. Танловда талабалар ҳам, ишлаб турган мутахассислар ҳам қатнашиши мумкин бўлади. Бироқ номзодларга жуда юқори талаблар қўйилади — соғлиқ ҳолати, физиологик кўрсаткичлар, илмий тайёргарлик даражаси ва хорижий тилларни билиш каби мезонлар бўйича.
Танловнинг аниқ муддатлари ва иштирок этиш шартлари ҳозирча ошкор этилмаган.
Бундан ташқари, агентлик айни пайтда президент учун турли сунъий йўлдош моделлари бўйича презентация тайёрламоқда. Хусусан, Ерни масофадан зондлаш учун мўлжалланган сунъий йўлдошнинг икки хил конструкция варианти таклиф этилмоқда.
«Биз учун асосий мақсад — аппаратнинг тузилиши: унинг таркибий қисмлари, фойдали юклама, қуёш панеллари ишлаш принципи ва сунъий йўлдошнинг орбитадаги кўринишини намойиш этиш», — деди Иброҳимов.
Шунингдек, у Япониянинг Kyushu Institute of Technology олийгоҳида таҳсил оётган Ўзбекистонлик етти нафар талаба биринчи миллий илмий сунъий йўлдошни яратиш устида ишлаётганини маълум қилди.
