Жанубий Корея суди собиқ президент Юн Сок Ёлни антиконституциявий исённи ташкил этгани ва ҳокимиятни ноқонуний сақлаб қолишга уринишда айбдор деб топиб, умрбод озодликдан маҳрум қилиш жазосига ҳукм қилди.
Суд хулосасига кўра, давлатнинг собиқ раҳбари парламент раҳбариятини ҳибсга олиш бўйича буйруқ берган, ҳарбий бўлинмаларни сафарбар этган ҳамда Корея Республикаси Миллий йиғини ишини куч ишлатиш орқали тўсишга уринган.
Эслатиб ўтамиз, 2024 йил декабрь ойида Юн Сок Ёл «конституциявий тартибни ҳимоя қилиш» ва «КХДР томонидан таҳдид»ни асос қилиб, мамлакатда ҳарбий ҳолат эълон қилган эди. Бироқ парламент мазкур фармонни бекор қилди ва шундан сўнг тергов ишлари бошланди.
Тергов хулосаларига кўра, собиқ президентнинг ҳаракатлари, жумладан, мудофаа вазирлиги раҳбарияти билан тил бириктиргани ва парламент фаолиятига зўравонлик билан тўсқинлик қилишга урингани ҳокимиятни ноқонуний сақлаб қолишга қаратилган бўлган.
Айблов томони ўлим жазосини талаб қилган. Бироқ суд антиконституциявий исёнга раҳбарлик қилиш учун қонунчиликда назарда тутилган энг кам жазо — умрбод озодликдан маҳрум қилиш жазосини тайинлади.
Аввалроқ бошқа шов-шувли иш доирасида собиқ президентнинг турмуш ўртоғи Ким Гон Хи молиявий фирибгарлик айбловлари бўйича оқланган эди. Кейинчалик унинг акциялар бозорида манипуляция ва сайлов жараёнига аралашиш билан боғлиқ янги эпизодлар бўйича ҳибсга олингани ҳақида хабарлар тарқалган.
Юн Сок Ёл маъмуриятининг қулашига сабаб бўлган давлат тўнтаришига уриниш депутатлар ва фуқаролар қаршилиги туфайли бир неча соат давом этган. Парламент ҳарбий ҳолатни бекор қилиш учун овоз бергач, импичмент жараёни бошланди ва у собиқ президентнинг истеъфоси ҳамда жиноий жавобгарликка тортилиши билан якунланди.
