Михаил Шайдоров Қозоғистон учун сўнгги ўттиз йил ичидаги илк қишки Олимпия олтин медалини қўлга киритди. 21 ёшли фигурист Италияда бўлиб ўтган Milan–Cortina 2026 Winter Olympics мусобақасида эркаклар яккалик дастурида ғолиб бўлди.
Қисқа дастурдан сўнг спортчи бешинчи ўринни эгаллаб турган эди. Бироқ эркин дастурда у кучлар нисбатини тубдан ўзгартиришга муваффақ бўлди. Шайдоров энг мураккаб элементлар сериясини хатосиз бажариб, 198,64 балл олди. Икки дастур якунларига кўра у жами 291,58 балл тўплаб, шахсий рекордини янгилади ва биринчи ўринни таъминлади.
Кумуш медаль япониялик Юма Кагиямага (280,06 балл), бронза эса унинг ватандоши Сюн Сатога (274,90 балл) насиб этди. Қисқа дастурдан кейин пешқадам бўлган америкалик Илья Малинин эркин дастурда хатоларга йўл қўйиб, саккизинчи ўринга тушиб кетди.
Бу ғалаба Қозоғистоннинг қишки Олимпия ўйинларидаги 1994 йилдан бери илк олтин мукофоти бўлиб, мамлакатнинг қишки спорт турларидаги кўп йиллик танаффусига барҳам берди.
