2025 йил давомида Ўзбекистонда табиий газдан ноқонуний фойдаланиш билан боғлиқ 173 минг 645 та ҳолат аниқланди. Бу ҳақда «Ҳудудгазтаъминот» компанияси матбуот хизмати маълум қилди.
Қонунбузарликлар «Ҳудудгазтаъминот»нинг комплаенс-назорат хизмати ходимлари томонидан бошқа газ таъминоти ташкилотлари билан ҳамкорликда ўтказилган текширувлар жараёнида фош этилган.
Текширувлар натижасига кўра, истеъмолчиларга 774,6 миллион куб метр табиий газ учун қўшимча ҳисоб-китоб қилинган. Ушбу ҳажмдаги газ қиймати 1 трлн 667 млрд 511 млн сўмни ташкил этган.
Шунингдек, назорат тадбирлари давомида 285 та ноқонуний газ «бункери» фаолияти тўхтатилди. Қолаверса, 12,3 минг дона маиший газ баллони ҳамда 137,7 тонна суюлтирилган газнинг ноқонуний айланмаси олди олинди.
