Ижтимоий тармоқларда Тошкентда ер усти метро линияси остида тўхтап турган автомобилга юқоридан сувоқ бўлаги тушиб, транспорт воситасига енгил зарар етгани ҳақида хабарлар тарқалди.
«Тошкент метрополитени» ДУК маълум қилишича, ҳодиса «Ер усти ҳалқа» йўналишининг Қўйлиқ ва Янгиобод бекатлари оралиғида содир бўлган. Метро ҳаракати вақтида табиий тебранишлар таъсирида юқори қисмидаги метро йўли фасадидан кичик сувоқ бўлаги ажралиб тушиб, остида тўхтап турган автомобилга етиб, зарар енгил эканлиги қайд этилган.
Ҳодиса аниқланган зоҳоти метрополитен ходимлари ҳудудни текширган, фасад қисми тўлиқ таъмирланган ва хавфсизлик чораларига оид қўшимча назорат ишлари амалга оширилган. Метро иншоотлари белгиланган техник талаблар ва хавфсизлик меъёрларига мувофиқ доимий назорат остида сақланиши таъкидланган.
«Тошкент метрополитени» ҳайдовчилардан шахсий автомобилларини фақат рухсат этилган ва белгиланган тўхташ жойларида қолдиришни сўради.
