Қозон шаҳрида диншунос Шигоҳабутдин Маржоний ҳаётига бағишланган Россия–Ўзбекистон қўшма фильми — «Устоз» картинаси суратга олиш ишлари якунланди. Асосий ролни актёр Булат Гатауллин ижро этди. У тиззасидан жароҳат олганига қарамай, ишни охиригача етказди.
Фильм Маржонийнинг Бухоро ва Самарқандда таҳсил олган даврини, шунингдек, унинг ватанига қайтиб, имом-хатиб сифатида фаолият бошлаган даврини қамраб олади. Суратга олиш ишлари 18 кун давом этди, жумладан Ўзбекистон ҳудудида ҳам ўтказилди. Лойиҳада 400 га яқин киши иштирок этди. Фильм режиссёрлари Рамил Тухватуллин (Татаристон) ва Илҳом Муҳаммадиброҳимов (Ўзбекистон) бўлди.
Фильмнинг Қозондаги премьераси сентябрь ойида «Олтин минбар» фестивали доирасида бўлиб ўтиши кутилмоқда. Ўзбекистонда эса намойиш баҳор ойларида режалаштирилган. Ижодкорлар фильмни бошқа тилларга таржима қилишни ва Маржоний ҳаётининг кейинги босқичларига бағишланган давомий қисм яратиш имкониятини ҳам кўриб чиқмоқда.
