Бухоро вилояти Вобкент тумани ИИБ профилактика инспектори, капитан Амрилло Расулов ўзини дарёга ташлаган аёлни қутқариб қолди. Бу ҳақда Ўзбекистон ИИВ Жамоат хавфсизлиги департаменти хабар берди.
Ҳодиса 29 январь куни соат тахминан 16:30 ларда содир бўлган. Сувда аёлни кўриб қолган ички ишлар органлари ходими ҳеч иккиланмасдан муздек сув ва кучли оқимга эга дарёга сакраб тушган. Воқеа жойига етиб келган гувоҳлар билан ҳамкорликда жабрланувчи соҳилга олиб чиқилган.
Етиб келган тез тиббий ёрдам бригадаси аёлни шифохонага олиб борган. Шифокорлар унинг аҳволини қониқарли, деб баҳоламоқда, зарур тиббий ёрдам кўрсатилган.
Маълум қилинишича, жабрланувчи 20 ёшда бўлиб, унинг тўрт нафар фарзанди бор. Аёл Бухоро вилояти Ғиждувон туманида яшайди.
Ҳодисанинг сабаб ва ҳолатлари ҳозирда аниқланмоқда.
