Ўзбекистонда атом электр станцияси қурилишини бошлаш 2026 йил декабридан олдин режалаштирилмаган. Бу жорий йилга мўлжалланган давлат дастури лойиҳасида қайд этилган.
Ҳужжатга кўра, 2026 йил давомида «Росатом» давлат корпорацияси билан қўшимча келишувни ишлаб чиқиш, имзолаш ва рўйхатдан ўтказиш режалаштирилган. Мазкур келишув янгиланган интеграциялашган лойиҳа конфигурациясини ҳисобга олади. Унга ВВЭР-1000 юқори қувватли реакторли энергоблок ҳамда РИТМ-200Н кичик қувватли реакторлар киради.
«Ўзатом» агентлиги маълум қилишича, лойиҳани амалга ошириш бўйича аввал эълон қилинган муддатлар ўз кучида қолмоқда. Давлат дастури лойиҳасида келтирилган сана эса тайёргарлик ва лицензиялаш билан боғлиқ барча мажбурий босқичлар 2026 йил охирига қадар якунланишини назарда тутувчи эҳтиёткор сценарийни акс эттиради.
Агентликда таъкидланишича, лойиҳа миллий қонунчилик ҳамда ядро ва радиация хавфсизлиги бўйича халқаро стандартларга қатъий риоя этилган ҳолда амалга оширилмоқда. Биринчи бетон қуйиш босқичига барча зарур рухсатномалар ва келишувлар олинганидан сўнггина ўтилади.
Эслатиб ўтамиз, 2025 йил октябрь ойида Жиззах вилоятининг Фариш туманида кичик қувватли атом электр станцияси учун майдон тайёрлаш ишлари бошланган эди. Шу йил сентябрь ойида эса Ўзбекистон ва Россия бир майдонда ҳам кичик, ҳам йирик АЭС қуриш бўйича келишувларни имзолаган. Лойиҳа амалга оширилган тақдирда, Ўзбекистон бир объектда турли типдаги атом станцияларини интеграция қилган илк давлатга айланади.
