Президент Шавкат Мирзиёев Тошкент шаҳридаги ҳуқуқни муҳофаза қилиш ва фавқулодда хизматлар фаолиятини кескин танқид қилди. У тергов ишлари сифати пастлиги, профилактика ишларининг сустлиги, бозорлар ва оммавий тўпланиш жойларида мувофиқлашув йўқлиги, шунингдек, рақамлаштиришдаги камчиликларга эътибор қаратди. Йиғилиш якунларига кўра, қатор раҳбарларга интизомий чоралар кўрилиб, кадрлар бўйича қарорлар қабул қилинди.
Президент Шавкат Мирзиёев раислигида ташкил этилган видеоселектор йиғилиши уюшган жиноятчилик, наркотрафик, кибержиноятлар ва яширин иқтисодиётга қарши кураш масалаларига бағишланди. Йиғилиш танқидий руҳда ўтди.
Давлат раҳбари ушбу таҳдидларнинг ҳар бири алоҳида ҳолда ҳам хавфли эканини, уларнинг биргаликдаги таъсири эса янада жиддий хатарлар келтириб чиқараётганини таъкидлади. Шу билан бирга, у пойтахтнинг ҳуқуқни муҳофаза қилиш тизими Тошкентнинг ривожланиш суръатлари ва кўламига мос эмаслигини қайд этди.
Сўнгги тўққиз йилда шаҳар аҳолиси 1 миллион нафарга ошган, автотранспорт воситалари сони 800 мингтага етган, ҳар куни пойтахтга қарийб 1 миллион киши келиб-кетмоқда. Тошкент иқтисодиёти ҳажми 367 трлн сўмга етган, аҳоли жон бошига даромад 116 млн сўмдан ошган. Бундай шароитда хавфсизлик тизими олдиндан ишлаши лозимлиги таъкидланди.
Шу билан бирга, тергов ва суриштирув бўлинмалари фаолиятида сифат етишмаслиги аниқланган. Ходимлар малакасининг пастлиги сабабли ўтган йили 833 та ҳолат бўйича жиноят ишлари қўзғатилмаган ва амалда ҳисобдан яширилган.
Жиноятчилик «2 мингтага камайди» деган маълумотларга қарамай, Тошкентда 26 та маҳалла “қизил” ҳудудда, яна 465 таси “сариқ” зонада қолмоқда. Мамлакатдаги 208 та туман орасида Чилонзор оилавий зўравонлик, талончилик ва безорилик бўйича етакчи ўринда, Юнусобод эса босқинчилик ҳолатлари бўйича биринчи ўринни эгаллаган. Ўтган йили Яшнобод ва Мирабад туманларида қотилликлар энг кўп қайд этилган, Олмазорда тан жароҳатлари, Шайхонтоҳурда эса талончилик ҳолатлари кўп бўлган.
Шу муносабат билан мазкур туманларда ички ишлар органлари раҳбарлари яқинда алмаштирилди ва уларга қисқа муддат ичида жиноятчилик билан боғлиқ вазиятни тубдан ўзгартириш вазифаси юклатилди.
Оммавий тўпланиш жойларида хизматлар ўртасидаги ҳамкорлик ҳам танқид остига олинди. Йирик бозорлар ва боғларда Миллий гвардия, ички ишлар органлари ва фавқулодда вазиятлар хизмати ўртасида ҳамкорлик суст экани қайд этилди. Ўтган йили бозорлар ва боғларда 87 та жиноят, шаҳар бўйича эса 774 та ёнғин ҳолати рўйхатга олинган.
Президент бозорларни рақамлаштириш ишлари жуда секин олиб борилаётганини ҳам таъкидлади. Ҳозирга қадар фақат «Чорсу» ва «Фарҳод» бозорларида ситуацион марказлар ташкил этилган. Ички ишлар вазирининг ахборот технологиялари бўйича ўринбосари Зокир Қурбонов икки йилдан ортиқ вақт аввал тайинланганига қарамай, тизимни рақамлаштириш бўйича сезиларли натижаларга эришилмагани кескин танқид қилинди.
Давлат раҳбари ушбу ва бошқа тизимли муаммолар, аввало, бошқарувдаги масъулиятнинг сустлиги натижаси эканини таъкидлади.
Натижада кадрлар бўйича қарорлар қабул қилинди: вазир ўринбосари Бахтиёр Абдуллаев ҳамда Республика профилактика хизмати раҳбари Хайрулла Қодиров эгаллаб турган лавозимларидан озод этилди.
Аввалроқ Тошкент шаҳар ИИББ бошлиғи Рустам Султонхўжаев ва шаҳар прокурори вазифасини бажарувчи Азамат Урмановга ҳайфсан эълон қилиниб, олти ойлик синов муддати белгиланган эди. Президент жамоат хавфсизлигини таъминлаш бўйича ёндашувларни тубдан қайта кўриб чиқиш ва ҳуқуқбузарликлар профилактикасини маҳаллаларда ўз асл вазифасига қайтаришни талаб қилди.
