АҚШ президенти Дональд Трампнинг JPMorgan Chase ва унинг бош директори Жейми Даймонга қарши 5 миллиард долларлик даъво аризаси маъмуриятнинг Уолл-стритга нисбатан сиёсатдаги қарама-қаршиликларини янада очиқ намоён қилди. Reuters маълумотларига кўра, мазкур даъво Трамп ва унга қарашли компаниялар ҳисобрақамлари сиёсий сабаблар билан ёпилгани ҳақидаги айбловларга асосланган. JPMorgan бу даъволарни рад этмоқда.
Ушбу қадам йирик молиявий институтлар учун сиёсий муҳитнинг беқарор ва баъзан душман сифатида кўрсатмоқда. Айни пайтда банклар Трамп маъмуриятининг кенг кўламли дерегуляция сиёсати орқали айрим соҳаларда ютуқларга эришмоқда, бироқ шу билан бирга янги хатарлар ва имиджга салбий таъсир эҳтимолига дуч келмоқда.
Трампнинг JPMorgan’га қарши даъво аризаси унинг истеъмол кредит карталари бўйича фоиз ставкаларини 10 фоиз билан чеклаш таклифи ортидан янгради. Жейми Даймон бу ғояни “иқтисодий офат” деб баҳолаган. Шу билан бирга, маъмурият регуляторлари финтех, криптовалюта компаниялари ва айрим корпорацияларга анъанавий банклар билан тўғридан-тўғри рақобат қилишни осонлаштираётгани қайд этилмоқда.
Оқ уй вакиллари эса молия бозорларини мустаҳкамлаш ва ортиқча тартибга солишни қисқартириш орқали иқтисодий ўсишни жадаллаштириш мақсад қилиб қўйилганини билдирмоқда. JPMorgan компанияси эса даъвони асоссиз деб ҳисоблаб, банк ҳисобрақамларни сиёсий ёки диний қарашлар асосида ёпмаслигини таъкидлади.
Трамп бошқа йирик молия институтларига нисбатан ҳам танқидлар билдирган. Хусусан, Trump Organization Capital One’га қарши ҳам шунга ўхшаш даъво билан чиққан. Bank of America ва Goldman Sachs раҳбарлари ҳам “дебанкинг” масаласида президент танқидига учраган, аммо банклар бундай амалиётни рад этиб келмоқда. Уолл-стрит банклари Вашингтондаги лоббичилик фаолиятини кучайтирган. 2025 йилнинг тўртинчи чорагида саккизта йирик банкнинг лоббичилик харажатлари қарийб 40 фоизга ошиб, 12 миллион долларга етган.
Шу билан бирга, бозор иштирокчилари Трамп маъмурияти регуляторлари йирик банклар учун катта капитал енгилликлари тақдим этишини кутмоқда. Айрим баҳоларга кўра, бу банклар учун 200 миллиард долларгача маблағни бўшатиб бериши мумкин. Шу сабабли, барча сиёсий зиддиятларга қарамай, банк акциялари бозорда ўз позициясини сақлаб қолмоқда.
