Хитойнинг ByteDance компанияси TikTok’нинг АҚШдаги бўлимига оид битимни якунлади. Bloomberg хабарига кўра, компания акцияларнинг 50 фоизини Oracle, Silver Lake ва MGX каби америкалик инвесторларга ўтказган. Мавжуд инвесторлар 30,1 фоиз улушга эга бўлади, ByteDance эса 19,9 фоизни сақлаб қолади.
Янги директорлар кенгаши етти нафар аъзодан иборат бўлиб, уларнинг аксарияти АҚШ фуқаролари ҳисобланади. Шу билан бирга, ByteDance TikTok’нинг АҚШдаги реклама бизнеси ва TikTok Shop платформаси устидан назоратни сақлаб қолади.
Битим 2024 йилда қабул қилинган АҚШ қонунчилиги талаблари доирасида амалга оширилган бўлиб, у контент модерациясини кучайтириш ва америкалик фойдаланувчилар маълумотларини ҳимоя қилишга қаратилган. АҚШ президенти Дональд Трамп янги эгаларни “америкалик ватанпарварлар” деб атади. TikTok’нинг АҚШда тахминан 200 миллион фойдаланувчиси мавжуд.
