ЎФА Тиббий қўмита раиси, Ўзбекистон Ёзувчилар уюшмаси аъзоси ва «Локомотив» ПФК бош шифокори Аброр Пирриевнинг расмий Telegram-каналида Ҳусниддин Алиқуловнинг ҳолати бўйича маълумот берилди.
Маълум қилинишича, футболчи чап тизза бўғимида жиддий жароҳат олган. Текширувлар натижасида олд хочсимон бойлам ҳамда менисклар йиртилиши, шунингдек, ёндош тўқималар шикастлангани аниқланган. Ушбу жароҳатлар малакали жарроҳлик амалиётини талаб қилади.
Қайд этилишича, операциядан кейинги реабилитация жараёни ўта муҳим бўлиб, ўртача 6–8 ой давом этади. Шу сабабли Ҳусниддин Алиқулов қарийб бир йилга катта футболдан узоқлашиши мумкин.
Футболчининг сафдан чиқиши мухлислар орасида катта хавотир уйғотган. Тиббий мутахассислар реабилитация жараёни тўлиқ бажарилса, у майдонга қайтиши мумкинлигини таъкидламоқда.
