Сув хўжалиги вазирлиги Самарқанд вилояти Ургут туманида жойлашган “Дарғом-1” насос станцияси ҳамда Ургут тумани “Сув етказиб бериш хизмати” давлат муассасаси тасарруфидаги “Ғиждувон” каналини давлат-хусусий шериклик (ДХШ) шартлари асосида бошқарувга бериш бўйича жамоатчилик фикрини ўрганишни бошлади.
Маълум қилинишича, мазкур лойиҳа Ўзбекистон Республикаси Президентининг 2025 йил 14 октябрда қабул қилинган “Қуйи бўғинда сув ресурсларини бошқариш тизимини янада такомиллаштириш ҳамда соҳанинг хусусий сектор учун жозибадорлигини ошириш чора-тадбирлари тўғрисида”ги ПҚ-302-сонли қарорига мувофиқ амалга оширилмоқда. Ҳужжатнинг 5-бандига асосан, айрим сув хўжалиги объектларини бошқаришга хусусий секторни жалб этиш кўзда тутилган.
Лойиҳа доирасида “Дарғом-1” насос станцияси ва “Ғиждувон” канали фаолиятини давлат-хусусий шериклик механизми орқали самарали бошқариш имкониятлари баҳоланади. Бу эса сув таъминоти тизимида хизмат сифатини ошириш, эксплуатация харажатларини оптималлаштириш ҳамда соҳада замонавий бошқарув усулларини жорий этишга қаратилган.
Қайд этилишича, жамоатчилик ва манфаатдор томонлар ўз фикр ва таклифларини 2026 йил 29 январь куни соат 18:00 га қадар Сув хўжалиги вазирлигининг Давлат-хусусий шериклик ва аутсорсинг хизматини ривожлантириш бошқармасига тақдим этишлари мумкин. Таклифлар 71 202-47-67 телефон рақами ёки dxsh@minwater.uz электрон почта манзили орқали қабул қилинади.
