19 январь куни Тошкент шаҳрида Ўзбекистон Республикаси Президенти Шавкат Мирзиёев Италия Бош вазири Жоржа Мелони билан учрашув ўтказди. Италия ҳукумати раҳбари пойтахтда қисқа тўхташ билан бўлган.
Учрашувда стратегик шерикликни янада мустаҳкамлаш ва ҳамкорликни кенгайтириш масалалари муҳокама қилинди. 2025 йил май ойида Самарқанд шаҳрида эришилган келишувларнинг изчил амалга оширилаётгани қайд этилди. Савдо алоқалари, қўшма корхоналар ва ҳудудлараро ҳамкорлик, жумладан Ломбардия вилояти билан ҳамкорлик фаол ривожланмоқда. Ўзбекистон фуқароларининг ташкил этилган меҳнат миграцияси учун квоталар ажратилгани таъкидланди.
Шунингдек, Finopera, ANCI, Pietro Fiorentini, Danieli ва бошқа компаниялар билан саноат кооперацияси лойиҳалари илгари сурилаётгани белгиланди. Самарқанд шаҳрида Тушиа университетининг филиали очилди. 2026 йилда ташқи сиёсат идораларининг стратегик мулоқоти, Ҳукуматлараро комиссия йиғилиши ҳамда Ректорлар иккинчи форумини ўтказиш режалаштирилган.
Маданий-гуманитар йўналишда ўзбек ва италян киноси кунларини ўзаро ўтказиш, Миланда амалий санъат кўргазмаларини ташкил этиш ҳамда Ўзбекистоннинг Венеция биенналесида иштирокини таъминлаш бўйича келишувга эришилди. Шунингдек, халқаро ва минтақавий кун тартиби юзасидан фикр алмашилди.
Учрашув якунида Шавкат Мирзиёев Жоржа Мелонини Ўзбекистонга алоҳида ташриф билан келишга таклиф этди.
