АҚШ Давлат котиби Марко Рубио Венесуэлада Николас Мадуро ҳокимиятдан ағдарилиб, қўлга олинган операциядан сўнг Вашингтон мамлакатни кундалик бошқариш ниятида эмаслигини маълум қилди. Унга кўра, АҚШ Венесуэлага нисбатан таъсирни асосан нефть соҳасидаги мавжуд чекловлар — “нефть карантини” орқали амалга оширади.
Марко Рубионинг айтишича, ушбу чекловлар аввалдан санкция қўлланган нефть ташувчи танкерларга нисбатан жорий этилган бўлиб, улар Венесуэлада сиёсат ўзгаришларини рағбатлантириш учун асосий босим воситаси сифатида сақлаб қолинади. Давлат котибининг таъкидлашича, мақсад нафақат АҚШ миллий манфаатларини таъминлаш, балки Венесуэла нефть саноати фаолиятини аҳоли манфаатлари йўлида ўзгартириш ва наркотрафикка чек қўйишдир.
Бу баёнот АҚШ Президенти Дональд Трампнинг аввалроқ айтган, Вашингтон Венесуэлада вақтинча “бошқарувни қўлга олади” деган сўзларидан кейин янгради. Рубио эса АҚШнинг бевосита давлат бошқарувида иштирок этмаслигини, асосий эътибор иқтисодий босим орқали ислоҳотларга қаратилганини билдириб, ушбу позицияни юмшатилган ёндашув сифатида изоҳлади.
Айни пайтда АҚШдаги расмийлар Каркасда ўтказилган ҳарбий операция давомида қурбонлар бўлганини тасдиқлади. Дональд Трампнинг сўзларига кўра, операция чоғида Кубага мансуб хавфсизлик ходимлари орасида ҳалок бўлганлар бор, бироқ АҚШ томонидан йўқотишлар қайд этилмаган.
Вазият халқаро жамоатчилик диққат марказида қолмоқда, Венесуэладаги кейинги сиёсий ва иқтисодий жараёнлар нефть чекловлари ва ташқи босимлар фонида қандай шаклланиши кузатилмоқда.
