Андижон вилояти Улуғнор туманида «Spark» ва «Damas» иштирокида йўл-транспорт ҳодисаси содир бўлди. Бу ҳақда «Газета.uz» хабар берди.
Маълум бўлишича, ҳодиса жорий йилнинг 13 октябрь куни тунги соат 01:30 да Улуғнор тумани Ўзбекистон маҳалласи ҳудудидан ўтган 4Р-81 Наманган-Мингбулоқ йўлида содир бўлган.
«Spark» ҳайдовчиси чарчоқ ҳолатида ухлаб қолиб, руль бошқарувини йўқотиши ортидан қатнов қисмининг қарама-қарши томонига ўтиб кетган. Шундан сўнг ўз йўналишида ҳаракатланиб келаётган «Damas» «Spark» билан тўқнашган. Тўқнашувдан кейин ҳар иккала машинада ёнғин юзага келган ва транспорт воситалари тўлиқ ёниб кетган.
«Uznews»нинг ёзишича, ЙТҲ оқибатида икки киши воқеа жойида вафот этган. Яна икки нафар фуқаро эса оғир тан жароҳатлари билан шифохонага ётқизилган.
Ҳолат юзасидан Улуғнор тумани ИИБ тергов бўлинмаси масъул ходимлари томонидан Жиноят кодексининг 266-моддаси 3-қисми (Одамлар ўлимига сабаб бўлган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, ҳозирда дастлабки тергов ҳаракатлари олиб борилмоқда.
