Хатирчи туманининг Олтинобод қишлоғилик Зулхумор Хўжамқулова қувончдан кўз ёшларини тия олмайди. Боиси ўғли Умиджонни саккиз йилдан буён қийнаб келаётган туғма хасталик устида Навоий вилоят кўптармоқли болалар шифохонаси шифокорлари мураккаб жарроҳлик операцияси ўтказишиб, дарддан фориғ этишди.
— Ўғлим туғма урологик нуқсон билан дунёга келган, — дейди З. Хўжамқулова. — Унга Тошкентда операция ўтказилишини билардик, лекин қўлимиз калталик қиларди. Минг қатла шукур, мана бугун унинг ҳам, менинг ҳам ташвишларимга, шу ерда ўзимизнинг шифохонамизда чора топилди. Тўғриси, бундай бўлишини кутмаган ҳам эдик.
Зулхумор Хўжамқулованинг дил сўзларида жорий йил фарзандларида мураккаб жарроҳлик операциялари ўтказилган икки юздан ортиқ онанинг миннатдорлиги мужассам. Шифохона жарроҳлари томонидан биргина жорий йилнинг ўзида мазкур оналарнинг болаларида юқори технологик операциялар амалга оширилиб, улар соғлом ҳаётга қайтарилди. Шуларнинг етмишдан ортиғи республикамизнинг етакчи клиникалари ҳамда болалар тиббий миллий марказининг малакали жарроҳлари билан ҳамкорликда илк бор амалга оширилди. Эндигина икки ёшни тўлдирган Жавлон Муродуллаев шулардан бири.
— Жавлон грипп билан оғриб, амбулатор даволанган, — дейди шифокор Жасур Раҳмонов. – Лекин даволанишни охиригача етказмаганлиги сабабли, касаллик кейинги босқичга ўтиб, ўпкани зарарлаган. Яъни, боланинг плевра бўшлиғида йирингли жараён кечиб, ҳаётига хавф солган. Бемор боланинг ўпкасида мураккаб жарроҳлик амалиёти ўтказилиб, ҳозирда операциядан кейинги даволаш муолажаларини олмоқда.
Таъкидлаш жоиз, вилоятда оғир хасталикка чалинган юзлаб болаларнинг дарддан фориғ бўлиши тасодиф эмас. Балки мамлакатимизда инсон қадри улуғланиб, унинг бебаҳо бойлиги саломатлигининг муҳофаза қилиниши, тиббиёт соҳасидаги ислоҳотлар, унинг ҳудудларга яқинлашиши самарасидир. Бу ислоҳотлар ҳамюртларимизнинг ҳаётдан розилигини ошириб, эртанги кунга ишончини янада мустаҳкамламоқда.
МАНБА: “Халқ сўзи”.
