2023 йилда “Тоза ҳаво” ойлигининг I (10 апрелдан 10 майга қадар) ва II (10 августдан 10 сентябрига қадар) босқичлари давомида жами 318 556 та автотранспорт воситалари экологик назоратдан ўтказилди. Натижада текширилган техникаларнинг 8652 таси ёки 2,75 фоизи атмосферага меъёридан ортиқ заҳарли ташламалар чиқараётганлиги аниқланди. Экология, атроф-муҳитни муҳофаза қилиш ва иқлим ўзгариши вазирлиги хабар берди.
Ишлатилган газларда ифлослантирувчи моддалар давлат стандартларининг белгиланган нормаларини қўпол равишда бузган 3329 та автотранспорт ҳайдовчисига нисбатан умумий 553 153 млн сўм жарима чоралари қўлланилди ҳамда 2914 та техника воситасининг ҳаракати вақтинчалик тўхтатиб қўйилди.
Текширилган автотранспорт воситаларининг 1043 таси ёки 2,2 фоизида ишлатилган газларининг ифлослантирувчи моддалари миқдори ўрнатилган меъёрлардан юқорилиги аниқланди ва автомобилларга техник хизмат кўрсатиш шахобчаларига юборилди.
«Таъкидлаш жоизки, “Тоза ҳаво” ойлиги давомида атмосферага жами 209 232 тонна ифлослантирувчи моддалар чиқарилишининг олди олинди. Тадбирдан асосий мақсад техника воситаларидан атмосфера ҳавосига меъёридан ортиқ заҳарли ташламалар чиқарилишига йўл қўймасликдир», дейилади хабарда.
