13 сентябрга ўтар кечаси Россия ҳаво ҳужумидан мудофаа кучлари Твер вилоятининг Конаковский муниципал округи ҳудудида учувчисиз самолётни уриб туширди.
“Жабрланганлар йўқ. Воқеа жойида фавқулодда хизматлар ишламоқда. Губернатор Игор Руденя вилоят бошқармаларига уларга барча зарур ёрдамни кўрсатиш бўйича топшириқ берди”, — дейилади вилоят матбуот хизмати хабарида.
ОАВ хабарларига кўра, дрон нишони Редкинский кимё заводи бўлган. Эрталаб соат бешларда учувчисиз учиш аппарати аниқланган ва йўқ қилинган. Шу билан бирга, дроннинг парчалари завод ҳудудига тушиб, омборга зарар етказган.
Бу кимёвий заводга иккинчи ҳужум — аввалгиси 5 сентябр куни содир бўлган. Редкинский тажриба заводи Россиядаги энг қадимги кимё саноати корхоналаридан биридир. У авиация ва космик саноат учун кимёвий маҳсулотлар ишлаб чиқаради.
