Аввал хабар қилганимиздек, Венгрияда бўлиб ўтган 35-Халқаро информатика олимпиадасида Дилёрбек Валижонов ва Дилшодбек Хўжаев бронза медалларини қўлга киритди. Бу Ўзбекистон учун ушбу фан бўйича олимпиададаги илк медаллар бўлди.
Шу билан биргаликда мазкур тадбирда Ўзбекистон делегацияси 2026 йилда юртимизда ушбу нуфузли олимпиадани ўтказиш учун аризани тақдимот қилди ва Комиссия аъзолари IOI 2026 йилда Ўзбекистонда ўтказишни маъқуллаганини эълон қилди. Бу ҳақда Рақамли технологиялари вазири Шерзод Шерматов хабар қилмоқда.
«Ушбу нуфузли олимпиадани илк бор Ўзбекистонда 2026 йилда юқори савияда ўтказилишига Рақамлаштириш вазирлиги ва IT Park Мактабгача ва мактаб таълими вазирлиги билан бир жамоа бўлиб тайёргарлик қиламиз насиб қилса», — деб ёзган вазир.
Шунингдек, маълум бўлишича, 2026 йилда Халқаро кимё олимпиадаси ҳам Ўзбекистонда ўтказилади.
