Қишлоқ хўжалиги вазири Азиз Воитов ҳамда Покистон Республикаси Панжоб вилояти Бош вазири Саид Моҳсин Раза Нақви ва «Ejaz Group» компанияси раҳбари Гоҳар Ижаз бошчилигидаги делгация ўртасида учрашув бўлиб ўтди деб хабар бермоқда Қишлоқ хўжалиги вазирлиги.
Унда бугунги кунда Ўзбекистон ва Покистон ўртасидаги кўп қиррали муносабатларнинг стратегик хусусиятлари ва аграр соҳадаги икки томонлама ҳамкорлик алоқаларини жадал суръатларда ривожланиб бораётгани, келгусида қишлоқ хўжалиги соҳаси равнақ топишидаги ҳамкорликнинг мавжуд имконият ва ресурсларини ривожлантириш истиқболлари муҳокама қилинди.
Шунингдек, учрашувда аграр соҳадаги ўзаро муносабатларни ривожлантиришнинг муҳим йўналишларидан ҳисобланган пахта етиштириш ва уруғчилик борасида ҳамкорлик қилиш ҳамда биргаликда янги лойиҳаларни амалга ошириш борасида ҳам фикр-мулоҳазалар алмашилди.
