Ижтимоий тармоқларда Тошкент шаҳри Яшнобод туманидаги Янгиобод ихтисослашган бозорида ноқонуний равишда Қизил китобга киритилган ноёб қушлар ва ҳайвонлар сотилаётгани акс этган суратлар тарқалди.
Вазиятни экология қўмитаси инспекторлари, Ички ишлар ва Миллий гвардия ходимлари ўрганишган. Маълум бўлишича, ҳақиқатан ушбу бозорда йўқолиб бораётган ноёб қушлар ва ҳайвонларни сотаётган шахслар аниқланган.
Тадбир давомида давлат инспекторлари томонидан 3 та ҳолатда ноқонуний равишда сотилаётган жами 63 та тошбақа тегишли тартибда олинган ва қонуний тўхтамга келингунга қадар вақтинчалик Тошкент ҳайвонот боғига топширилган.
Шунингдек, Қизил китобга киритилган ушбу ноёб ҳайвонларни қонунга зид равишда сотаётган фуқароларга нисбатан Ўзбекистон Республикаси «Маъмурий жавобгарлик тўғрисидаги кодекси»нинг тегишли моддаларига асосан ҳужжатлар расмийлаштирилиб, белгиланган тартибда чора кўрилишини таъминлаш мақсадида ҳуқуқ тартибот идораларига топширилди.
