Олий Мажлис Сенати ва Ўзбекистон Иқтисодиёт ассамблеяси ўртасида ҳамкорлик меморандуми имзоланди.Ўзбекистон Иқтисодиёт ассамблеяси 2021 йилда ташкил этилган бўлиб, тузилма 13 уюшма манфаатларини ҳимоя қилади ва 100 мингга яқин тадбиркорни ўз сафида бирлаштирган.
Сенат раиси Танзила Норбоева ҳамда Ассамблея раиси Мухтор Умаров имзолаган ҳужжат замонавий қонунчилик базасини шакллантириш, амалга оширилаётган иқтисодий ислоҳотларни қўллаб-қувватлашга қаратилган.
Ишбилармонлик муҳитини яхшилаш, тадбиркорликни қўллаб-қувватлаш орқали ҳудудларнинг жадал ривожланишини таъминлаш, бюрократик тартиб-тамойилларни қисқартириш, экспортни рағбатлантириш ҳам меморандумда назарда тутилган.
Сенат раиси Т.Норбоева таъкидлаганидек, меморандум тадбиркорлар муаммоларини ҳал этишда Сенатнинг фуқаролик жамияти институтлари ва тадбиркорлик субъектлари билан ҳамкорлигини мустаҳкамлашга хизмат қилади.
